John Snorri Sigurjónsson bíður enn átekta í grunnbúðum við fjallið K2. Hann hyggst reyna að klífa fjallið hættulega fyrstur Íslendinga. Talið er að aðeins um 240 manns hafi toppað K2 og 29% þeirra sem reyna láta lífið. 

Vegna snjóflóðs sem féll við búðir 3 hefur John Snorri beðið átekta í grunnbúðum fjallsins. „Við vorum búnir að leggja línur upp á milli búða 3 og 4 og við vitum ekki ástandið á línunum. Einnig vorum við búnir að fara upp með súrefniskúta,“ segir John Snorri í samtali við mbl.is en slæmt veður hefur gert það að verkum að enn er ekki mögulegt að kanna aðstæður.  

Frétt af mbl.is

„Fjallið verður að vera öruggt“

Enn innan tímarammans

„Það komu reyndar fréttir í dag [18. júlí] þess efnis að vind ætti að lægja 22. júlí. Það eru 58 km/klst. núna og þeir hafa ekki komist lengra en upp í búðir 2,“ segir John Snorri. Upphaflega var markmiðið að toppa K2 í kringum 20. júlí, sem er í dag, en John Snorri vonast nú til að komast á toppinn 24. eða 25. júlí.

Blaðamanni lék forvitni á að vita hversu langan tíma það tekur að komast frá grunnbúðum upp á topp. „Það tekur um fjóra daga ef allt gengur upp. Tölfræðin segir að flestir sem hafa náð alla leið eru að toppa í kringum 26.–28. júlí og eins og staðan er í dag erum við innan þess ramma,“ segir John Snorri.

Úr grunnbúðum K2 blasir allt fjallið við í allri sinni dýrð. Ljósmynd/Lífsspor á K2

Enginn hefur toppað síðan 2014

Aðspurður hversu lengi hann muni bíða segir John Snorri að hann muni líkast til bíða fram til 7. ágúst. „Ég veit að aðrir hópar sem eru hérna ætla heim 4. ágúst. Einhverjir hafa toppað fyrstu vikuna í ágúst en líklega er hægt að telja á fingrum annarrar handar hversu margir hafa toppað í miðjum ágúst,“ segir John Snorri.

Enginn hefur náð að komast upp á topp fjallsins síðan 2014. „í fyrra var hópur búinn að koma búnaði sínum fyrir í búðum 3 en fór niður í búðir 2 yfir nóttina og á meðan féll snjóflóð sem sópaði öllum búnaði í burt og enginn komst á fjallið,“ segir John Snorri.

Erfitt að bíða og horfa á toppinn

„Hér frá grunnbúðum horfir maður á fjallið í heild sinni. Það er bara hérna beint fyrir framan mann. Á Everest sérðu ekki fjallið, þú þarft að fara í burtu til þess að sjá toppinn,“ segir John Snorri og bætir við að dag og nótt heyrist í grjóthruni og snjóflóðum. „Það er rosa erfitt að bíða,“ segir John Snorri að lokum og eftirvænting og ákefð hans leynir sér ekki.

Kvik­mynda­gerðarmaður­inn Kári Schram er einnig staddur í grunnbúðunum og hef­ur fylgt John Snorra eft­ir í nokkra mánuði við und­ir­bún­ing ferðar­inn­ar. Kári er að vinna að alþjóðlegri heim­ild­ar­mynd um ferðalagið og fylgdi John Snorra einnig í grunn­búðir Ev­erest fyr­ir nokkr­um vik­um þegar John Snorri gekk upp á fjórða hæsta fjall heims, Lhot­se.

Hægt er að fylgj­ast með John Snorra á vefsíðunni Lífsspor en hann safn­ar áheit­um fyr­ir Líf Styrkt­ar­fé­lag á leið sinni og allur ágóði rennur beint til félagsins.

Einnig er hægt að fylgjast með ferðum hans hér:

K2 í hnotskurn

• Fjallið er næsthæsta fjall í heimi eða 8.611 metrar og staðsett á landamærum Kína og Pakistan.
• Um 29% þeirra sem reyna að klífa fjallið láta lífið sem gerir það að næst hættulegasta fjalli í heimi en aðeins Annapurna er talið hættulegra.
• Talið er að á milli 230-270 manns hafi náð að toppa fjallið en í samanburði hafa rúmlega 4.000 manns toppað Everest.
• Enginn Íslendingur hefur áður reynt að klífa fjallið og verður John Snorri því fyrstur Íslendinga á toppinn takist honum ætlunarverk sitt. 
• Grunnbúðirnar eru í 5.000 metra hæð og allt kjöt kemur á fæti þangað og er slátrað þar sökum þess hversu löng leiðin er. 
• Við fjallið eru: grunnbúðir, grunnbúðir fyrir lengra komna (e. Advanced base camp), búðir 1, búðir 2, búðir 3, búðir 4 og svo toppurinn. 

Tengdar fréttir

John Snorri

Segir frásögn norsku fjallgöngukonunnar uppspuna

• Beðin að klippa á taug Johns Snorra
• Snjóflóðahætta fólgin í að færa lík Johns Snorra
• Ekki tókst að færa John Snorra
• Fundar með forsetanum á morgun

» Fleiri tengdar fréttir

• Blogga um frétt