Leitað er að uppsprettu saurkólígerlamengunar í Varmá í Mosfellsbæ en hún er talin stafa annað hvort af rotþróm eða dýraúrgangi. Þetta segir Árni Davíðsson, heilbrigðisfulltrúi Mosfellsbæjar, í samtali við mbl.is.
Greint var frá því að gerlamengun hefði mælst í Varmá en tekin voru fimm sýni 14. og 17. júlí síðastliðinn, tvö í Varmá, tvö í Markalæk og eitt úr ofanvatnsstút frá Reykjalundi.
„Það geta verið margar uppsprettur og ég býst frekar við að það séu rotþrær sem þarf að tæma eða eru ekki fullnægjandi. Mengunin getur líka komið frá dýraúrgangi,“ segir Árni.
Stefnt er því að taka fleiri sýni úr Varmá til þess að sjá hvaðan mengunin kemur en búið er að einangra eina uppsprettu í skurði sem rennur í Markalæk. Komi í ljós að uppsprettan sé gölluð rotþró við íbúðarhús segir Árni að gerð sé krafa um að úr því verði bætt.
Hann segir hins vegar að enn sé á huldu hvað hafi drepið fiskana. „Ef það skolast hratt úr rotþró getur komið ammoníak í ánna en mér finnst það ólíkleg skýring.“