Um helmingur barnaverndarstarfsmanna í Reykjavík segist hafa orðið fyrir ofbeldi í starfi af hálfu aðstandenda barnanna. Samkvæmt nýlegri viðhorfskönnun, sem greint var frá í kvöldfréttum Stöðvar 2, hafa 50% starfsmanna Barnaverndar Reykjavíkur orðið fyrir einhvers konar aðkasti, t.a.m. líkamlegu áreiti eðakynferðislegu.
Eru dæmi um að starfsmenn hætti að mæta í vinnuna vegna þessa. Steinunn Bergmann, félagsráðgjafi og sérfræðingur hjá Barnaverndarstofu, segir í viðtali við Stöð 2, að þetta sé mikið áhyggjuefni og vill að gripið verði inn í.
Hún segir málin sjaldnast rata á borð lögreglu. Ástæðan sé m.a. að starfmenn þurfi sjálfir að tilkynna slík mál.
„Ef fólk verður fyrir hótunum eða einhverri áreitni þá tilkynnir starfsmaður sínum yfirmönnum, en ef það á að leita til lögreglu eða kæra slík mál þá þarf starfsmaðurinn að kæra það sjálfur. Það er heilmikið ferli og ekki víst að allir leggi í það ferðalag,“ segir Steinunn.
Talsvert sé um að fólki sé hótað og jafnvel nefnt að menn viti hvar það býr og hvar börn þess séu í leikskóla. „Það er mjög óþægilegt fyrir starfsmann að starfa undir slíkum ótta við að einhver komi og geri börnunum mein.“
Steinunn segir þá að álag á barnaverndarstarfsmenn hafi aukist mikið, en á síðasta ári bárust barnavernd rúmlega 9.000 tilkynningar.