Fjarskiptatruflanir á Vestfjörðum eru að mestu leyti komnar í lag, þar sem flétta 1 er komin í loftið, sem nær til 99,9% landsmanna. Vonast er til að öllum fjarskiptaörðugleikum á svæðinu ljúki fyrir miðnætti.
Ljósleiðari á Vestfjörðum fór í sundur klukkan hálftvö í dag, með þeim afleiðingum að truflanir voru á útvarpssendingum, sjónvarpssendingum og netsambandi. Ljósleiðarastrengurinn rofnaði milli Krossholts og Þverár og olli truflunum um alla Vestfirði.
Tæknimenn á vegum Mílu eru komnir á staðinn, en Míla er þjónustuaðili fyrir ljósleiðarastrenginn sem fór í sundur. Þetta kemur fram í tilkynningu frá upplýsingafulltrúa Vodafone, Báru Mjöll Þórðardóttur.
Þeir viðskiptavinir sem ná fléttu 1 geta því náð sjónvarpssambandi. Einnig nást Rás 1, Rás 2 og Bylgjan í gegnum FM-dreifikerfið í lofti. Netsamband næst nú á einhverjum stöðum en það gæti verið hægvirkt.