„Við munum vinna þetta í samvinnu og gera þetta eins vel og við getum,“ segir Guðmundur Heiðar Helgason, markaðs- og upplýsingafulltrúi Strætó, en fyrirtækið mun á næstu dögum bregðast við auknu álagi vegna fjölda erlendra skáta sem komnir eru hingað til lands á alþjóðlegt skátamót.
Um er að ræða nokkur þúsund erlenda skáta sem taka þátt í World Scout Moot, sem hefst á morgun, en stór hluti þeirra mun nýta sér almenningssamgöngur á höfuðborgarsvæðinu. Að sögn Guðmundar verður aukavagn til taks ef fjöldinn á leiðum sem skátarnir munu nýta sér verður of mikill fyrir vagna sem sinna reglubundnum ferðum.
Mótssvæðið er Laugardalshöll og munu skátarnir gista í 11 skólum um höfuðborgarsvæðið. Bandalag íslenskra skáta gaf út tilkynningu vegna þessa, þar sem þau tjáðu áhyggjur sínar um að skátar myndu sprengja almennigssamgöngukerfi Reykjavíkurborgar ef Strætó brygðist ekki við.
Til þess að bregðast við álaginu mun Strætó senda út aukavagna eftir bestu getu á þær leiðir þar sem álagið kann að vera sem mest. Fulltrúar skátahreyfingarinnar munu á sama tíma reyna að dreifa álaginu í vagnana eins mikið og mögulegt er.
Guðmundur bendir á að þegar álag aukist þurfi stundum að bregðast við með þessum hætti. Til að mynda hafi verið sendur út aukavagn á leið 57 sem fer norður á Akureyri um helgina vegna mikils álags. Þá hafi verið sendur út aukavagn þegar litahlaupið Color Run fór fram í júní.
Um er að ræða stærsta skátamót sem fram hefur farið á Íslandi og stærsta mót á vegum heimshreyfingarinnar fyrir þetta aldursbil. Mótið hefst í Laugardalshöll á morgun og verður því slitið 2. ágúst.