Samtökin Andstæðingar stóriðju í Helguvík biðla til hluthafa, fjárfesta stóriðju og annarra hagsmunaaðila að endurskoða afstöðu sína til frekari fjárveitinga til stóriðju í Reykjanesbæ. Þetta kemur fram í tilkynningu sem samtökin sendu frá sér síðdegis.

Stóriðjan er í túnfæti bæjarins og leikskólar og skólar í aðeins 1,4 kílómetra fjarlægð, að því er segir í tilkynningunni. „Frá því að rekstur United Silicon hófst í nóvember síðastliðnum hafa íbúar í Reykjanesbæ ekki farið varhluta af mengun frá kísilverinu. Reykur hefur almennt umlukið verksmiðjuna og í norðanáttum leggst eiturefnamengun (ýmist súr eða lyktarlaus) yfir bæinn. Í öðrum vindáttum berst mengunin til Garðs og Sandgerðis. Þegar svo ber við eru margir tilneyddir til að halda sig innandyra og loka gluggum á heimilum sínum.“

Starfsemin sé í óþökk bæjarbúa, sem séu sumir farnir að finna fyrir breytingum á heilsufari til hins verra, og vel yfir þúsund kvartanir hafi borist Umhverfisstofnun.

„Er ekki mál að linni og komið að þeim tímapunkti að átta sig á því að kísilmálmverksmiðjur eru ekki eins frábær fjárfestingakostur og þið hélduð í upphafi. Það mun aldrei ríkja sátt um kísilver í Helguvík hjá íbúum sem þurfa að þola heilsutjón og verulega skert lífsgæði vegna starfseminnar,“ segir í tilkynningunni þar sem Festa lífeyrisjóður, Frjálsi lífeyrisjóðurinn, Eftirlaunasjóður flugmanna og Arion banki eru spurð hvort þau séu tilbúin að leggja orðspor sitt að veði.

Tengdar fréttir

Kísilverksmiðja United Silicon í Helguvík

Óttast að kröfur fyrnist vegna seinagangs í rannsókn

• Dæmt til að borga 217 milljóna lán
• Arion segir þrjá kosti í stöðunni
• PCC skoðar kaup á kísilverksmiðjunni í Helguvík
• Gjaldþrotið byggir á 1,8 milljarða kröfu

» Fleiri tengdar fréttir

• Blogga um frétt