Ísland marki stefnu til lengri tíma

Nú er lag fyrir Íslendinga að skipta yfir í græna orku. Þetta er mat Runólfs Ólafssonar, framkvæmdastjóra FÍB, en hann á von á mikilli fjölgun rafbíla hér á landi á næstu árum.

Í umfjöllun um mál þetta í Morgunblaðinu í dag segir hann tækifærin m.a. felast í því að aldur bílaflotans sé hár. Grundvallaratriði sé þó að stjórnvöld móti skýra stefnu til framtíðar.

„Við þurfum að hugsa aðeins lengra en til næsta árs. Það er nokkuð sem við verðum að læra af þjóðunum í kringum okkur,“ segir Runólfur, en stjórnvöld í Bretlandi og Frakklandi hafa á síðustu vikum gefið út að sala á bensín- og dísilbílum verði bönnuð frá og með árinu 2040.