Hæstiréttur hefur staðfest niðurstöðu héraðsdóms um að vísa frá dómi ógildingarkröfu Jóhannesar Rúnars Jóhannssonar og Ástráðs Haraldssonar á hendur íslenska ríkinu vegna skipan dómara við Landsrétt.

Hæstiréttur fellir hins vegar úr gildi úrskurð Héraðsdóms Reykjavíkur um að vísa frá dómi viðurkenningarkröfu Jóhannesar og Ástráðs og hefur lagt fyrir héraðsdóm að taka þá kröfu til efnismeðferðar. Þá kemst Hæstiréttur að þeirri niðurstöðu að ríkið greiði þeim Jóhannesi og Ástráði 800.000 krónur í kærumálskostnað.

Frétt af mbl.is

Kröfum Jóhannesar og Ástráðs vísað frá

Þeir Jóhannes og Ástráður voru báðir meðal 33 umsækjenda um embætti dómara við Landsrétt og meðal þeirra 15 sem sérstök dómnefnd hafði talið hæfasta til að gegna því embætti. Þegar dómsmálaráðherra gerði tillögu til Alþingis um hvaða 15 umsækjendur skyldi skipa dómara við réttinn voru hvorki Jóhannes né Ástráður meðal þeirra sem ráðherra lagði til að yrðu skipaðir.

Alþingi samþykkti tillögur ráðherra og voru þær í kjölfarið sendar forseta Íslands sem ritaði undir skipunarbréf þeirra 15 dómara sem ráðherra lagði til.

Báðir höfðuðu þeir í kjölfarið mál á hendur íslenska ríkinu þar sem báðir fóru fram á ógildingu athafna ráðherra og í  öðru lagi fóru þeir fram á viðurkenningu á skaðabótaskyldu ríkisins vegna þess tjóns sem þeir töldu sig hafa orðið fyrir vegna þessa. Í þriðja lagi var farið fram á miskabætur.

Í fyrstu var í fréttinni því ranglega haldið fram að Hæstiréttur hafi vísað frá öllum kröfum Ástráðs og Jóhannesar. Fréttin hefur verið uppfærð og það leiðrétt.

Tengdar fréttir

Landsréttur

Eiganda buy.is gert að greiða 258 milljónir

• Sex mál endurupptekin vegna Landsréttarmálsins
• Mál Guðmundar fyrir Landsrétt á ný
• Endurupptaka breyti ekki endilega niðurstöðunni
• Gott að það sé komin staðfesting

» Fleiri tengdar fréttir

• Blogga um frétt