Meðlimir í Ferðaklúbbnum 4x4 fordæma akstur Land Cruiser jeppa upp hlíð Esjunnar á laugardag, en bíllinn festist í mýrlendi í um 400 metra hæð og situr enn fastur.
Greinileg djúp hjólför eru eftir jeppann í grasinu og leitar lögregla nú leiða til að losa bílinn og ná honum niður af fjallinu þannig sem minnst rask verði á umhverfinu.
„Við fordæmum þennan akstur og það tjón sem þessi háttsemi var völd af. Stjórn, Umhverfisnefnd og félagsmenn Ferðaklúbbsins 4x4 eru tilbúnir að aðstoða og hjálpa til við lagfæringar á þeim ummerkjum sem urðu við aksturinn,“ segir Sveinbjörn Halldórsson, formaður klúbbsins. Hann segir félagsmenn tilbúna að aðstoða á allan þann hátt sem þeir geta, hvort sem það er við að losa bílinn eða lagfæra jarðrask, sé þess óskað.
Sveinbjörn segir félagsmenn klúbbsins búa yfir mikilli þekkingu og tækjabúnaði, líkt og björgunarsveitir, til að takast á við verkefni af þessum toga.
Umræður hafa skapast um málið á Facebook-síðu Ferðaklúbbsins 4x4, en þar er meðal annars varpað fram hugmynd um hvernig best sé að fjarlægja bílinn. „Fara á 44 - 46 tommu bíl, hleypa vel úr, spila hann afturábak og mýkja svo dekkin á honum og dúlla til baka sömu leið, ef búið er að finna lyklana þá býð ég mig fram i verkið,“ skrifar einn sem hugsanlega gæti aðstoðað lögreglu við verkefnið.
Á Facebook-síðunni eru einnig birtar myndir sem náðust af ökumanni og farþegum jeppans þegar þeir yfirgáfu hann á laugardag eftir að hafa fest sig. Þar kemur fram að þeir hafi lagt á flótta undan myndatökumanninum, vitað upp á sig sökina.
Lögreglu gekk erfiðlega að hafa uppi á eiganda jeppans, en það náðist ekki í hann fyrr en eftir hádegi í dag. Um tveimur sólarhringum eftir að bíllinn festist. Gaf hann skýrslu hjá lögreglu, sagðist hafa verið með ferðamenn í bílnum og verið að reyna að snúa við þegar hann festi bílinn.