Gæslan bjargaði hval í nauðum

Skipverjar á varðskipinu Þór björguðu í gær nauðstöddum hval  á Dýrafirði. Það var síðdegis í gær sem stjórnstöð Landhelgisgæslunnar bárust upplýsingar frá formanni björgunarsveitar Slysavarnafélagsins Landsbjargar á Þingeyri um að sést hefði til hnúfubaks á Dýrafirði sem virtist vera með veiðafæri flækt utan um sporðinn. Svo virtist sem þetta kæmi í veg fyrir að hann gæti kafað eða synt um. 

Frétt af mbl.is

Hvalur flæktur í veiðafæri

Varðskipið Þór, sem var þá statt undan Vestfjörðum, var sent áleiðis inn á Dýrafjörð til þess að finna hvalinn og freista þess að skera veiðarfærin frá sporði dýrsins. 

Það var svo rétt fyrir klukkan níu í gærkvöldi sem varðskipsmenn komu auga á hvalinn utarlega í Dýrafirði. Var þá bátur skipsins sjósettur og nokkrir skipverjar héldu af stað, ásamt viðeigandi verkfærum, til að skera veiðarfærin. 

Í tilkynningu Landhelgisgæslunnar segir að aðgerðin hafi heppnast vel, því að um 20 mínútum síðar hafi hvalurinn verið laus við netadræsuna, netakúlurnar og annað það sem flækst hafði utan um sporðinn. 

Hnúfubaknum láðist þó víst að þakka varðskipsmönnum björgunina, en hann lét sig hverfa ofan í undirdjúpin um leið og virtist vera frelsinu feginn.

• Blogga um frétt