Ísland verður heiðursgestur á jólamarkaðnum í Strassborg í Frakklandi. Þetta kemur fram á heimasíðu íslenska sendiráðsins í Frakklandi en þar er auglýst eftir fyrirtækjum til þátttöku.
Markaðurinn er sá elsti sinnar tegundar í Evrópu en hann var fyrst opnaður árið 1570. Hann er jafnframt með þeim stærstu í heimi og áætlað að tvær milljónir gesta heimsæki markaðinn árlega.
Íslenska þorpið verður á Gutenberg-torginu í miðborg Strassborgar. Skipuleggjendur markaðarins útvega aðstöðu og þjónustu íslensku fyrirtækjunum að kostnaðarlausu. Umsóknarfrestur er þegar runninn út en ekki fengust upplýsingar um hvaða fyrirtæki þekktust boðið.