Erlendum starfsmönnum sem eru hér á landi á vegum starfsmannaleiga, innlendra sem erlendra, fjölgar ört og voru þeir samtals 1.879 í júlímánuði á vegum 30 starfsmannaleiga.
Kemur þetta fram í skýrslu Vinnumálastofnunar um stöðuna á vinnumarkaðnum, sem birt var í gær. Þessum starfsmönnum hefur því fjölgað til muna á milli mánaða, eða um 311 að því er fram kemur í skýrslunni.
Spáir stofnunin áframhaldandi fjölgun starfsmanna starfsmannaleiga á næstu mánuðum. „Ef þróunin næstu þrjá mánuði verður sú sama og á sama tíma í fyrra þá má ætla að fjöldi starfsmanna starfsmannaleiga eigi eftir að aukast um tæp 37%, verður þá fjöldi starfandi starfsmanna starfsmannaleiga orðinn 2.500 í október næstkomandi,“ segir í umfjöllun um mál þetta í Morgunblaðinu í dag.