Rútubílstjóri hjá Kynnisferðum, sem tekinn var fyrir ölvun við akstur um verslunarmannahelgina og sviptur ökuréttindum til bráðabirgða, starfar ekki lengur hjá fyrirtækinu. „Við tökum mjög fljótt og hart á svona málum,“ segir Kristján Daníelsson, forstjóri Kynnisferða/Reykjavík Excursions.
Samkvæmt upplýsingum lögreglunnar á Suðurlandi var maðurinn stöðvaður vegna gruns um ölvun við akstur að kvöldi laugardagsins 5. ágúst vestan við Hnappavelli, skammt frá Jökulsárlóni. Öndunarsýni sýndu fram á að hann var ölvaður og var hann því handtekinn og fluttur á lögreglustöð þar sem tekið var blóðsýni til frekari staðfestingar. Slíkt er viðtekin venja samkvæmt upplýsingum lögreglunnar á Suðurlandi. Þegar niðurstöður úr blóðsýnarannsókn liggja fyrir verður maðurinn kærður.
Kristján segir málið einstakt hjá fyrirtækinu í sinni forstjóratíð. Um 300 bílstjórar starfa hjá Kynnisferðum.
Í ítarlegri grein DV um málið og fleiri tilvik sem tengjast Kynnisferðum, segir að bílstjórinn sé Íslendingur á fimmtugsaldri. Í greininni segir ennfremur: „Samkvæmt heimildarmönnum DV er það altalað meðal rútubílstjóra hjá BSÍ og víðar að [Kynnisferðir] taki ekki á þessum málum.“
Spurður um þessa fullyrðingu svarar Kristján því til að hart og fljótt sé tekið á málum sem koma upp hjá fyrirtækinu. „Síðustu ár hefur verið mikill vöxtur hjá okkur og vöntun á bílstjórum,“ segir Kristján. „Við þurfum að aðlaga okkur að breyttu umhverfi. Við erum með tiltölulega strangt og gott ráðningarferli sem og kennslu- og innleiðingarferli. En í stóru fyrirtæki eins og okkar gerast hlutir og við tökum einfaldlega á því. Margt af þessu er þess eðlis að við getum ekki tekið á því fyrr en eftir á í raun.“
Í gegnum tíðina hafa mál er tengjast ölvun atvinnubílstjóra komið inn á borð lögreglunnar á Suðurlandi. Samkvæmt upplýsingum hennar gerist slíkt ekki oft. Í slíkum tilvikum ber ökumaðurinn sök samkvæmt lögum, ekki fyrirtækið sem hann starfar hjá. Viðurlög við ölvunarakstri atvinnubílstjóra eru þau sömu og ölvaðra ökumanna almennt.