Gamalt plakat frá flugfélaginu Loftleiðum, líklega frá árinu 1955, er nú til sölu á vefsíðunni eBay. Athygli vekur að verðmiðinn er um 600 Bandaríkjadalir, eða um 65 þúsund íslenskar krónur.
Seljandinn safnar plakötum og er með mikinn fjölda þeirra til sölu. Á plakatinu er fjögurra hreyfla flugvél Loftleiða auk merkis flugfélagsins og titils þess á ensku, „Icelandic Airlines“. Endar þess eru rifnir og sums staðar lagfærðir með límbandi. Einnig eru blettir á plakatinu, sem er 62 sentímetrar á breidd og 99 sentímetrar á hæð.
Hans Indriðason, starfsmaður Loftleiða til 53 ára sem sinnti m.a. starfi sölustjóra í Bandaríkjunum, segir að eflaust gangi margir munir safnara á milli. Hann nefnir að fyrir um tólf til þrettán árum hafi verið til sölu gamlar töskur merktar Loftleiðum. „Þetta er mikil baktería hjá sumum,“ segir hann í Morgunblaðinu í dag.