Ferðaskrifstofur á Íslandi hafa fundið fyrir auknum áhuga Íslendinga á að fara á Everton-leiki eftir vistaskipti Gylfa Þórs Sigurðssonar frá Swansea City til Everton.
Luka Kostic hjá Úrvali-Útsýn segir marga hafa fylgst með félagsskiptum Gylfa og séu áhrifin því mikil. Vegna þess ætlar ferðaskrifstofan að skipuleggja ferðir á leiki Everton í vetur.
Lúðvík Arnarson hjá ferðaskrifstofunni VITA segir í svari til Morgunblaðsins að skrifstofan hafi fundið meiri áhuga Íslendinga á leikjum Everton. VITA hefur verið með eina til tvær ferðir á leiki Everton undanfarin ár og segir Lúðvík að stefnt sé að fjölga þeim ferðum í vetur í ljósi vistaskipta Gylfa Þórs.
Gaman ferðir hafa boðið upp á ferðir á alla heimaleiki Everton síðustu ár, segir í svari Þórs Bæring Ólafssonar hjá Gaman ferðum við fyrirspurn Morgunblaðsins um áhuga Íslendinga á að fara utan á leiki Everton.