Gera sjónvarpsþáttaröð um feril Eiðs Smára

Tökur hófust í vikunni á sjónvarpsþáttaröð um knattspyrnuferil Eiðs Smára Guðjohnsen, fyrrverandi landsliðsfyrirliða Íslands. Í þáttunum verða heimsótt flest þau félög sem Eiður hefur leikið með á löngum og glæsilegum ferli, til dæmis Chelsea og Barcelona, og rætt við ýmsa fyrrverandi leikmenn, bæði samherja Eiðs og mótherja.

Þeir verða tveir á ferð í þáttunum, Eiður Smári og æskuvinur hans, sjónvarpsmaðurinn Sverrir Þór Sverrisson, Sveppi.

Það er Pegasus sem framleiðir þættina en þeir verða sýndir í Sjónvarpi Símans snemma árs 2018. Þáttaröðin verður kölluð Gudjohnsen.

„Þetta verða sex þættir,“ segir framleiðandinn, Lilja Snorradóttir. „Tökur hófust í vikunni þegar Eiður hitti strákana sem spiluðu með honum í 6. flokki og þjálfara þeirra. Þeir tóku vináttuleik og allt var mjög vel heppnað og skemmtilegt.“

Félagarnir fara á flakk í september þegar upptökur hefjast af fullum krafti en þeim lýkur snemma í nóvember þegar leikur Chelsea og Manchester United í ensku úrvalsdeildinni fer fram í London.

„Við höfum verið í samskiptum við nokkra þeirra klúbba sem Eiður lék með og þetta gengur í raun miklu betur en við þorðum að vona. Allir eru með opnar dyr; Eiður Smári nýtur greinilega mikillar velvildar úti,“ segir Lilja Snorradóttur. Leikstjóri þáttanna er Kristófer Dignus.

Snillingarnir Ronaldino, þá opinberlega besti knattspyrnumaður heims, og Andrés Iniesta, fagna marki sem Eiður Smári gerði fyrir Barcelona í spænsku deildinni árið 2006. Reuters

Eiður Smári, lengst til hægri í aftari röð, og gamlir samherjar hans í ÍR hittust í vikunni þegar tökur hófust. Á neðri myndinni eru þeir í 6. flokki á sínum tíma. Sveppi neðst til vinstri. mbl.is