Hvers vegna var Birna myrt?

Fyrirhugað er að Thomas Møller Olsen mæti fyrir dóm á ...
Fyrirhugað er að Thomas Møller Olsen mæti fyrir dóm á morgun. mbl.is/Kristinn Magnússon

Á morgun, mánudaginn 21. ágúst, hefst aðalmeðferð í máli ákæruvaldsins gegn Thomasi Fredrik Møller Ol­sen í Héraðsdómi Reykjaness. Thomas, sem er grænlenskur ríkisborgari fæddur árið 1987, er ákærður fyrir að hafa ráðið Birnu Brjánsdóttur bana í janúar síðastliðnum.

Birna fannst látin við Selvogsvita hinn 22. janúar eftir að hafa verið saknað í átta sólarhringa. Thomas hefur frá upphafi haldið fram sakleysi sínu, en ákæruvaldið telur frásögn hans vera í hróplegu ósamræmi við sönnunargögn málsins.

Fyrirhugað er að Thomas muni mæta fyrir dóm á morgun og gefa skýrslu. 

Gera má ráð fyrir að leitað verði svara við spurningu sem hefur brunnið á þjóðinni frá því að örlög Birnu urðu ljós: Hvers vegna var Birna myrt?

Frétt mbl.is: Hróp­legt ósam­ræmi í frá­sögn Ol­sens

Frétt mbl.is: Hvað hefur gerst frá handtöku Thomasar

Birna Brjánsdóttir.
Birna Brjánsdóttir. Af Facebook

Þjóðin stóð á öndinni

Birna Brjáns­dótt­ir hvarf aðfar­anótt laug­ar­dags­ins 14. janú­ar síðastliðins og sást henni síðast bregða fyr­ir í eft­ir­lits­mynda­vél­um í miðborg Reykja­vík­ur. Hafði hún verið að skemmta sér í hópi vina. Á mynda­vél­um sást einnig rauð Kia Rio bif­reið sem í ljós kom að skip­verj­ar á grænlenskum togara höfðu haft til umráða þessa nótt.

Sími Birnu tengdist nokkrum farsímamöstrum eftir að hún sást síðast á eftirlitsmyndavélinni, en síðast sást merki frá símanum í Hafnarfirði áður en slökkt var á honum.

Samstarfskona Birnu hafði samband við fjölskyldu hennar eftir að hún skilaði sér ekki til vinnu á laugardagsmorgun. Fjölskyldan hóf í kjölfarið óformlega leit sem ekki skilaði árangri. Lýst var fyrst eftir Birnu það sama kvöld og hófst þá rannsókn lögreglu. Notast var við eftirlitsmyndavélar til að rekja för hennar.

Á mánudeginum eftir það var leitarfólk frá björgunarsveitum Slysavarnafélagsins Landsbjargar kallað út og hófst þá formleg leit að Birnu. Til að byrja með var leitað í miðbænum þar sem hún sást síðast á myndavélum, en fljótlega var leitinni beint að Hafnarfirði. Á þriðjudeginum fann sjálfboðaliði svartan Dr. Martens-skó eins og þann sem Birna hafði klæðst. Staðfest var að skórinn var af henni en taldi lögregla að honum hefði verið komið fyrir.

Umfangsmesta leit frá upphafi

Nærri 800 björg­un­ar­sveit­ar­menn, ásamt lög­reglu og starfs­mönn­um Land­helg­is­gæsl­unn­ar tóku þátt í leit að henni á víðfeðmu svæði sem teygði sig um allt suðvest­ur­horn lands­ins. Er um að ræða um­fangs­mestu leit sem Slysa­varna­fé­lagið Lands­björg hef­ur ráðist í nokkru sinni. 

Al­menn­ing­ur lagði einnig sitt af mörk­um við leit­ina og segja má að þjóðin hafi staðið á öndinni á meðan Birnu var saknað. All­ir vonuðust eft­ir krafta­verki, að Birna myndi finn­ast á lífi.

Það var svo hinn 22. janúar sem þyrla Landhelgisgæslunnar fann Birnu látna við Selvogsvita. Í kjölfarið helltist áþreif­an­leg sorg yfir allt sam­fé­lagið, sem lamaðist við fréttirnar. Birna var fædd 28. nóv­em­ber árið 1996 og var því tví­tug að aldri þegar hún lést.

Eft­ir að lík Birnu fannst við Sel­vogs­vita héldu björg­un­ar­sveit­ar­menn áfram leit á svæðinu í þeirri von um að finna eig­ur Birnu eða eitt­hvað annað sem gæti varpað skýr­ara ljósi á at­b­urðarás­ina. Meðal ann­ars hvar henni hefði verið komið fyr­ir í sjó eða vatni. Sú leit bar hins veg­ar ekki ár­ang­ur.

Frétt mbl.is: Birna fannst lát­in við Sel­vogs­vita

Birna Brjánsdóttir sást á eftirlitsmyndavélum ganga upp Laugaveg kl. 5.25 ...
Birna Brjánsdóttir sást á eftirlitsmyndavélum ganga upp Laugaveg kl. 5.25 að morgni laugardagsins 14. janúar. Mynd úr eftirlitsmyndavél við Laugaveg

Heldur fram sakleysi sínu

Thomas Møller Ol­sen hefur verið í haldi lögreglu síðan 18. janúar þegar lögreglumenn í sérsveit ríkislögreglustjóra handtóku hann og annan skipverja grænlenska togarans Polar Nanoq um borð í skipinu. Tóku sérsveitarmennirnir jafnframt yfir stjórn skipsins og var því siglt til Hafnarfjarðarhafnar. Mennirnir tveir voru í kjölfarið úrskurðaðir í gæsluvarðhald, en hinn maðurinn, Nikolaj Olsen, var látinn laus tveimur vikum síðar.

Mennirnir höfðu verið með Kia Rio-bifreiðina til umráða, og urðu þeir grunaðir í málinu eftir að blóð fannst í bílnum.

Ákæra var gef­in út á hend­ur Thom­asi hinn 30. mars síðastliðinn og var málið þing­fest í Héraðsdómi Reykja­ness hinn 10. apríl. Þar kom fram að Thom­as segðist sak­laus af því að hafa banað Birnu. Er hann einnig ákærður fyr­ir stór­fellt fíkni­efna­laga­brot, en hann á að hafa reynt að smygla rúm­lega 23 kíló­um af kanna­bis­efn­um, sem hann hafði komið fyr­ir í klefa sín­um í Pol­ar Nanoq. Hann sagðist jafn­ramt sak­laus af þeim ákæru­lið. Þá hafnaði hann bóta­kröfu for­eldra Birnu upp á 10,5 millj­ón­ir fyr­ir hvort þeirra.

Eft­ir að ákæra var gef­in út á hend­ur Thom­asi var rann­sókn á Nikolaj hætt. Var hann ekki leng­ur grunaður um aðild að verknaðnum og laus allra mála. Nikolaj mun mæta fyrir dóm á morgun og gefa skýrslu sem vitni.

Frétt mbl.is: Öðrum sleppt úr gæslu­v­arðhaldi

Frétt mbl.is: Ákærður fyr­ir að hafa banað Birnu

Kia Rio bifreiðin.
Kia Rio bifreiðin.

Var á lífi þegar henni var varpað í sjó

Thom­as er ákærður fyr­ir mann­dráp, með því að hafa að morgni laug­ar­dags­ins 14. janú­ar, svipt Birnu lífi, að því er fram kemur í ákær­unni. Þar kem­ur fram að Thomas hafi veist að henni með of­beldi í rauðri Kia Rio-bif­reið sem lagt var ná­lægt flot­kví í Hafn­ar­fjarðar­höfn, eða á öðrum óþekkt­um stað.

Hann „sló hana ít­rekað í and­lit og höfuð, tók hana kverka­taki og herti kröft­ug­lega að hálsi henn­ar og í fram­hald­inu, á óþekkt­um stað, varpaði ákærði Birnu í sjó eða vatn, allt með þeim af­leiðing­um að Birna hlaut punkt­blæðing­ar í augn­lok­um, táru og glæru augn­lok­anna og inn­an­vert höfuðleður, þrýst­ings­áverka á hálsi, þar á meðal brot á vinstra efra horn skjald­kirt­ils­brjósts, nef­brot, marga höggá­verka í and­liti og á höfuð og drukknaði,“ seg­ir í ákær­unni. Birna var því með lífs­marki þegar henni var varpað í sjó.

Brotið er talið varða við 211. grein al­mennra hegn­ing­ar­laga, en refs­ing við slíku broti er að lág­marki fimm ára fang­elsis­vist.

Thomas var sam­tals í ein­angr­un á Litla-Hrauni í sex vik­ur en var svo flutt­ur í fang­elsið á Hólms­heiði af ör­ygg­is­ástæðum og þótti þá ekki leng­ur þörf á að hann sætti ein­angr­un. Gæslu­v­arðhaldi var hins veg­ar fram­haldið.

Við rannsókn málsins sagði lögregla að ekk­ert benti til þess að Birna hefði átt í sam­skipt­um við menn­ina fyrr um kvöldið, þ.e. áður en hún fór upp í bíl­inn, lík­lega við hús nr. 31 við Lauga­veg. Ljóst þætti að þau hefðu ekki þekkst eða verið í sam­skipt­um áður.

Frétt mbl.is: Skil­ríki Birnu sögð hafa fund­ist um borð

Frétt mbl.is: Ýmsar vís­bend­ing­ar fund­ist í skip­inu

Leitin að Birnu teygði sig um allt suðvest­ur­horn lands­ins.
Leitin að Birnu teygði sig um allt suðvest­ur­horn lands­ins. Kort/mbl.is

„Ætli þeir séu komn­ir til að sækja mig?“

Málið var þingfest hinn 10. apríl síðastliðinn, en þá lýsti Thomas yfir sakleysi sínu. Fyrirhugað var svo að hefja aðalmeðferð málsins hinn 18. júlí og átti Thomas þá að gefa skýrslu. Þar sem matsgerð þýsks réttarmeinafræðings lá hins vegar ekki fyrir var þinghaldinu frestað og Thomas mætti ekki fyrir dóminn.

Fyrirtaka í málinu fór engu að síður fram þann dag, 18. júlí, og voru þá teknar skýrslur af sjö skipverjum Polar Nanoq. Sögðust þeir þekkja Thomas að góðu einu, og sögðu málið koma sér í opna skjöldu. Þeir greindu hins vegar frá því að það hafi vakið grun þeirra þegar Thomas fékk send skilaboð vegna málsins.

Frétt mbl.is: Þekkja Thomas að góðu einu

Annars vegar var um að ræða skilaboð frá íslenskum blaðamanni vegna málsins, og hins vegar frá kærustunni hans í Grænlandi. Í þeim stóð: „Þú ert kannski grunaður um þetta.“

Sögðu skipverjarnir að ekki hefði borið á neinu einkennilegu í fari Thomasar þegar skipið hélt úr höfn í Hafnarfirði. Þegar skip­inu hefði verið snúið til hafn­ar hafi ástand Thomasar hins vegar versnað sí­fellt; hann hefði verið tauga­óstyrk­ur og neitað öll­um boðum um mat. Skipverjarnir hefðu ákveðið að ljúga því að honum að skipinu hefði verið snúið við vegna vélarbilunar, og slökkt var í kjölfarið á netinu um borð í skipinu.

Thom­as hefði þá spurt einn skipverjanna: „Ætli þeir séu komn­ir til að sækja mig?“ þegar lög­regl­an hefði komið um borð.

Frétt mbl.is: Slökktu á netinu og lugu um vélarbilun

Skipverjar Polar Nanoq í Héraðsdómi Reykjaness þar sem skýrslur voru ...
Skipverjar Polar Nanoq í Héraðsdómi Reykjaness þar sem skýrslur voru teknar af þeim. mbl.is/Ófeigur

Sagði tvær stúlkur hafa verið með í bílnum

Fyrsti stýri­maður á Pol­ar Nanoq sagði Thom­as hafa sagt að tvær stúlk­ur hefðu verið með hon­um og Ni­kolaj í bíln­um aðfaranótt laug­ar­dags­ins 14. janú­ar.

Stýri­maður­inn sagði frá­sögn Thomas­ar og fé­laga hans Ni­kolaj hafa tekið ein­hverj­um breyt­ing­um eft­ir því sem á leið, en rætt hefði verið ým­ist um eina stúlku eða tvær í bíln­um með þeim þessa nótt. Thom­as hefði hins veg­ar sagst hafa ekið tveim­ur stúlk­um í versl­un Krón­unn­ar.

Þá sagði skipstjóri skipsins við vitnaleiðslur að hann hefði sagt við Thom­as að hann hefði ekk­ert að ótt­ast ef hann hefði ekki gert neitt af sér. Thom­as hefði þá sagst ekk­ert rangt hafa gert.

Sagði hann fjöl­miðla sí­fellt hafa hringt í skipið. Eitt sinn hefði hann tekið upp tólið en þá hefði yf­ir­lög­regluþjónn verið á lín­unni. Lög­reglumaður­inn hefði spurt þriggja spurn­inga, hvort vopn væru um borð, hversu langt þeir ættu eft­ir í land og loks hvar þeir myndu koma að landi. Var hon­um þá tjáð að lög­regl­an myndi koma til skips­ins, vopnuð um borð í þyrlu.

Síðar hefði lög­regla komið um borð, hand­tekið Thom­as og Ni­kolaj og fært þá hvorn í sína ká­et­una. Hann hefði þá af­hent lög­regl­unni úlpu Thomas­ar dag­inn eft­ir að skipið kom til hafn­ar.

Meðal þess sem fannst í skipinu voru skilríki Birnu.

Frétt mbl.is: Gekk upp landganginn með handklæði

Frétt mbl.is: Fjölmiðlar hringt sífellt í skipið

Polar Nanoq Skipið sneri aftur til Íslands að beiðni íslensku ...
Polar Nanoq Skipið sneri aftur til Íslands að beiðni íslensku lögreglunnar. mbl.is/Eggert Jóhannesson

Blóð úr Birnu á fötum Thomasar

Við þing­fest­ing­una hinn 10. apríl óskaði verj­andi Thom­asar eft­ir tíma til að fara yfir gögn máls­ins og var þing­haldi því frestað til 25. apríl. En sak­sókn­ari máls­ins skilaði meðal ann­ars inn geðheil­brigðis­vott­orði og viðbót­ar­göngn­um vegna notk­un­ar síma sem er meðal gagna máls­ins.

Við fyr­ir­töku hinn 25. apríl óskaði verj­andi ákærða eft­ir viðbótar­fresti til að klára yf­ir­ferð gagna. Þá fór ákæru­valdið fram á áfram­hald­andi gæslu­v­arðhald. Í úr­sk­urðinum kom fram að mikið af blóði úr Birnu hefði fund­ist á úlpu Thom­asar og á öðrum föt­um hans. Þá fund­ust þekju­fr­um­ur úr Thom­asi og Birnu á skóm henn­ar við höfn­ina í Hafnar­f­irði, sem fund­ust hinn 16. janú­ar. Lög­regl­an var full­viss um að þeim hefði verið komið þar fyr­ir í þeim til­gangi að villa um fyr­ir lög­regl­unni, en það voru sjálf­boðaliðar sem tóku þátt í leit­inni að Birnu sem fundu skóna.

Hinn 9. maí fór fram önn­ur fyr­ir­taka í mál­inu. Þar lagði ákæru­valdið fram viðbót­ar­grein­ar­gerð vegna staðsetn­ingar síma­núm­ers Thomasar og verj­andi hans lagði fram tvær mats­beiðnir. Ann­ars veg­ar varðandi fimm spurn­ing­ar fyr­ir rétt­ar­meina­fræðing og hins veg­ar tvær spurn­ing­ar fyr­ir bæklun­ar­lækni.

Erfitt að finna réttarmeinafræðing til verksins

Við fyr­ir­töku hinn 16. maí lagði ákæru­valdið svo fram viðbót­ar­grein­ar­gerð vegna notk­un­ar á sím­um og af­rit af græn­lensku saka­vott­orði ákærða, sem átti eft­ir að þýða yfir á ís­lensku.

Þá var dóm­kvadd­ur bæklun­ar­lækn­ir, Ragn­ar Jóns­son, feng­inn til að meta Thom­as og hvort hann hefði verið fær um að fremja verknaðinn sem hon­um er gefið að sök að hafa framið. Þá hafði enn ekki feng­ist rétt­ar­meina­fræðing­ur til að taka málið að sér. Bundn­ar voru von­ir við að sænsk­ur rétt­ar­meina­fræðing­ur kæmi til aðstoðar, en það gekk ekki eft­ir.

Viku síðar, eða hinn 23. maí, hafði þýski rétt­ar­meina­fræðing­ur­inn Urs Oli­ver Wies­brock, feng­ist til að taka málið að sér. Gert var ráð fyr­ir því að hann yrði bú­inn að svara spurn­ing­um sem fyr­ir hann voru lagðar, fyr­ir 27. júní, en það gekk ekki eft­ir.

Fyrirhugað er að Wiesbrock gefi skýrslu fyrir dómi á þriðjudag og kynni niðurstöður sínar.

Frétt mbl.is: Enn vant­ar rétt­ar­meina­fræðing

Við fyr­ir­töku í mál­inu hinn 7. júní krafðist verj­andi Thomas­ar þess að fá af­hent farsíma­gögn fyr­ir tíma­bilið 14. janú­ar, klukk­an 06.00, til 15. janú­ar, klukk­an 06.00. Um er að ræða gögn úr farsíma­möstr­um sem staðsett eru við Suður­strand­ar­veg, m.a. við Strand­ar­kirkju.

Kröf­unni var mót­mælt af hálfu ákæru­valds­ins, sem sagði hana ber­sýni­lega þarf­lausa. Dóm­ari í mál­inu sagði að þar sem gögn­in væru varðveitt hjá fjar­skipta­fyr­ir­tækj­um myndi hann boða þau fyr­ir­tæki fyr­ir dóm þar sem kraf­an yrði tek­in sér­stak­lega fyr­ir. Frestaði hann þing­haldi til fimmtu­dags­ins 15. júní, en frestaðist fyr­ir­tak­an til 16. júní. 

Blaðamannafundur vegna málsins í janúar.
Blaðamannafundur vegna málsins í janúar. mbl.is/Eggert Jóhannesson

Átti að meta lengd tímas sem lík Birnu var í sjónum

Þá kom fram að meðal þeirra gagna sem lögð hefðu verið fram í mál­inu af hálfu ákæru­valds­ins væri gæðamat tækni­deild­ar á fingra­för­um. Verj­andi Thomasar lagði á sama tíma fram sam­an­tekt fjöl­miðlaum­fjöll­un­ar um málið og um tíu ljós­mynd­ir. Hann féll jafn­framt frá kröfu um af­hend­ingu farsíma­gagna, þangað til frek­ari gagna hefði verið aflað. 

Við síðustu fyr­ir­töku var lögð fram mats­gerð Ragn­ars Jóns­son­ar bæklun­ar­lækn­is sem svara átti tveim­ur spurn­ing­um.

Sjötta spurn­ing­in var einnig lögð fyr­ir þýska rétt­ar­meina­fræðing­inn Urs Oli­ver Wies­brock, en til viðbót­ar við fyrri fimm spurn­ing­ar var hon­um falið að meta hversu lengi lík­ami Birnu hefði verið í sjó þegar hann fannst.

Frétt mbl.is: Gæðamat fingrafara meðal gagna

Fjölmörg vitni verða leidd fyrir dóm á morgun, þar á meðal skipverjar Polar Nanoq og íslenskir lögreglumenn sem komu að rannsókn málsins. Á þriðjudag halda vitnaleiðslur áfram og mun Urs Wiesbrock, þýskur réttarmeinafræðingur og dómkvaddur matsmaður í málinu, kynna niðurstöður sínar, en honum var gert að svara nokkrum spurningum. Þá lýkur skýrslutökum fyrir dómi á föstudag þegar annar réttarmeinafræðingur, geðlæknir, lögreglumaður og vitni gefa skýrslur.

Frá útför Birnu Brjánsdóttur.
Frá útför Birnu Brjánsdóttur. mbl.is/Eggert Jóhannesson
mbl.is

Innlent »

Björn Ingi stofnar nýjan flokk

15:45 Björn Ingi Hrafnsson fjölmiðlamaður hefur stofnað lénið samvinnuflokkurinn.is, en þvertekur þó fyrir að vera á leið í framboð. Vísir.is greinir frá þessu. Hægt er að fletta léninu upp á isnic.is og þar sést að hann er skráður rétthafi þess. Meira »

Rafræn prófkjör Pírata hafin

15:28 Kosning í prófkjörum Pírata fyrir alþingiskosningar 2017 er hafin, en framboðsfrestur rann út klukkan 15.00 í öllum kjördæmum og hófst kosning í kjölfarið. Aðildarfélög Pírata ráða formi kosninga. Meira »

Veggirnir ekki árekstrarprófaðir

15:13 Veggir beggja vegna Miklubrautar, milli Lönguhlíðar og Rauðarárstígs, kosta samtals 60 milljónir króna. Þeim er ætlað að bæta hljóðvist og umhverfisgæði íbúa og þeirra sem nota Klambratún sem og að stýra þverumferð gangandi og hjólandi vegfarenda. Hvorugur veggjanna hefur verið árekstrarprófaður. Meira »

Ástfangin Ágústa Eva gaf þessu séns

14:59 Ágústa Eva Erlendsdóttir veit ekki hvort hún hefði gefið verkefninu séns ef hún væri ekki svona ástfangin en tímasetningin var góð og hún tók lögum Gunna Hilmarssonar um ástina fagnandi. Til varð hljómsveitin Sycamore Tree sem sendir frá sér sína fyrstu plötu um helgina. Meira »

Frítekjumark verði 100.000 kr.

14:14 Frítekjumark tekna ellilífeyrisþega verður hækkað upp í 100.000 krónur á mánuði verði Sjálfstæðisflokkurinn við völd eftir kosningar. Þetta kom fram í ræðu Bjarna Benediktssonar formanns á fundi flokksmanna á Hótel Nordica í dag. Meira »

Norsk norðurljós ekki íslensk

13:38 Fjallað er í norskum fjölmiðli um auglýsingu sem blasir við farþegum í íslenskri flugstöð þar sem þeir eru boðnir velkomnir til Íslands og á auglýsingunni er mjög flott norðurljósamynd. En gallinn er að myndin er ekki tekin á Íslandi heldur í Noregi. Meira »

Skora á Willum Þór

13:23 Framsóknarmenn í Kópavogi skora á Willum Þór Þórsson, fyrrverandi þingmann, að gefa kost á sér til að leiða lista flokksins í kjördæminu. Meira »

„Þeir brugðust sem stóðu manni næst“

13:33 „Þeir sem brugðust voru þeir sem stóðu manni næst,“ segir Bjarni Benediktsson, formaður Sjálfstæðisflokksins. Vísar hann þar til ákvörðunar Bjartrar framtíðar að slíta ríkisstjórnarsamstarfinu og yfirlýsinga forystumanna Viðreisnar um að það hafi einnig staðið til hjá þeim. Meira »

Áslaug Arna staðgengill varaformanns

12:57 Áslaug Arna Sigurbjörnsdóttir, ritari Sjálfstæðisflokksins, verður staðgengill varaformanns Sjálfstæðisflokksins meðfram ritarastarfinu fram að landsfundi flokksins. Meira »

Staðið vaktina í 41 ár og ekki á förum

12:54 María Einarsdóttir, pylsudrottning í Bæjarins beztu, kom í drottningarviðtal í Turninn á K100 í morgun. Hún talaði um lífið í pylsuvagninum, vinnu á eftirlaunaaldrinum og fleira. Meira »

Ekkert tilefni til gönuhlaups BF

12:52 „Við erum hér saman komin vegna gönuhlaups tveggja flokka, sem gáfu sig þó út fyrir bætt vinnubrögð.“ Þetta sagði Sigríður Andersen dómsmálaráðherra á fundi Sjálfstæðismanna á Hótel Nordica fyrr í dag. Meira »

Uppstilling hjá Framsókn í Reykjavík

12:52 Kjördæmaráð Framsóknarflokksins í Reykjavík samþykkti á fundi sínum í morgun að stilla upp á lista flokksins í Reykjavíkur-kjördæmunum tveimur. Listarnir verða kynntir á fundi kjördæmaþings 5. október. Meira »

Ofurhetjur á Húsavík

12:43 Landkönnunarverðlaun Leifs Eiríkssonar, Leif Erikson Exploration Awards, verða veitt í þriðja sinn í dag.  Meira »

Eldri borgarar til bjargar RIFF

12:02 Auglýst var eftir sjálfboðaliðum til starfa fyrir RIFF á vef Félags eldri borgara. Viðbrögðin létu ekki á sér standa. Sjálfboðaliðarnir segjast hafa sótt um til að prófa eitthvað nýtt og spennandi og hafa nóg að gera. Meira »

Stilla væntanlega upp í S-kjördæmi

11:19 Unnur Brá Konráðsdóttir, forseti Alþingis og þingmaður Sjálfstæðisflokksins í Suðurkjördæmi, á von á því að flokkurinn muni ekki halda prófkjör í kjördæminu fyrir komandi alþingiskosningar. Meira »

Sumarhýran var í veskinu

12:29 Ung kona sem var við störf á Íslandi í sumar átti veskið sem heiðarlegur borgari kom með á lögreglustöðina í Reykjanesbæ í gærkvöldi. Alls voru 3.800 evrur, sem svarar til 490 þúsund króna, í reiðufé í veskinu. Meira »

Ríkinu gert að greiða fyrir gæsluvaktir

11:58 Íslenska ríkið var í Hæstarétti í vikunni dæmt til að greiða fyrrverandi yfirlækni við Heilbrigðisstofnun Vestfjarða tæpar 14 milljónir króna fyrir gæsluvaktir sem hann átti rétt á eftir að staða hans var lögð niður á sínum tíma. Í héraðsdómi var íslenska ríkið sýknað af kröfu mannsins. Meira »

Kosningafundur sjálfstæðismanna í beinni

11:01 Opinn kosningafundur sjálfstæðismanna með Bjarna Benediktssyni, formanni Sjálfstæðisflokksins fór fram á Hilton Reykjavík Nordica fyrir hádegi. Fundurinn var sendur út í beinni útsendingu og hægt var að fylgjast með henni á mbl.is. Meira »
Íslenskir stálstólar - nýklæddir - 4 stykki
Er með fjóra flotta íslenska stáeldhússtóla, nýtt áklæði, á 12.500 kr. stykkið....
Herbergi til leigu
Erum með rúmgott rými/herbergi til leigu í einbýlishúsi í Kópavogi. Sérinngangu...
Akureyri - vönduð íbúðagisting
Vönduð og vel útbúin íbúðagisting. Uppábúin rúm, net og lokaþrif. Komdu á norður...
Nokkrar notaðar saumavélar til sölu !!
Nokkrar tegundir, ýmsar gerðir. Allar ástandsskoðaðar og prófaðar af fagmanni. V...
 
Utankjörfundaratkvæða- greiðsla uta
Tilkynningar
Utankjörfundaratkvæðagreiðs...
Eldri borgarar
Staður og stund
Aflagrandi 40 Það er opin vinnustofa hjá...
Rafræn kosning hofsprestakall
Tilkynningar
Auglýsing um prestskosningu í Hofspr...
Eldri borgarar
Staður og stund
Aflagrandi 40 Dagurinn byrjar á opinni v...