Innlent | mbl | 25.8.2017 | 16:49 | Uppfært 18:03

SS lækkar verð til bænda um 26%

Steinþór Skúlason er forstjóri SS. Hann segir að fækka þurfi fé um 20%. Eggert Jóhannesson

Sláturfélag Suðurlands greiðir um fjórðungi lægra dilkaverð til sauðfjárbænda núna, samanborið við árið í fyrra. Verðskrá fyrirtækisins var gefin út í dag og er að jafnaði 26% lægri en í fyrra. Kílóverð fyrir lömb í algengasta flokki R2, lækkar úr 649 krónum við upphaf sláturtíðar í fyrra, í 481 krónu nú.

Aðrir sláturleyfishafar hafa tilkynnt um allt að 35 prósent lækkun á afurðaverði til bænda, að óbreyttu.

Frétt af mbl.is

Boðuð lækkun á afurðaverði váboði

Borga meira en aðrir

Steinþór Skúlason, forstjóri SS, leggur í samtali við mbl.is áherslu á að SS greiði 17-18 prósent hærra verð fyrir kjötið en aðrir sláturleyfishafar. „Við borguðum fimm til sjö prósent meira en aðrir í fyrra og staðan er sú núna að við erum að borga 14 prósent meira, samkvæmt verðskrá. Við erum auk þess að staðgreiða kjötið og álagsgreiðslur í september eru hærri hjá okkur en hinum. Munurinn er því 17-18 prósent.

Spurður hvort SS sé með þessu að sækjast eftir auknu fé til slátrunar segir hann að svo sé ekki. „Þetta er einfaldlega mat félagsins á því hversu langt við eigum að ganga við að lækka verð í einu skrefi.“

Frétt af mbl.is

„Við getum ekki borgað okkur laun“

Tap á útflutningi

Hann segir, eins og landbúnaðarráðherra hefur raunar bent á, að fækka þurfi fé í landinu um 20% og segir að breyttar aðstæður til útflutnings ráði þar miklu um. Eftir hrun hafi kjöt sem flutt var út skilað hærra verði en innanlandsmarkaður. Styrking á gengi krónunnar og aðstæður á erlendum mörkuðum hafi snúið dæminu við.

Sláturleyfishafar glími við þá staðreynd í dag að verulegt tap sé á útflutningi á kjöti. Þá bendir hann á að verð á lambakjöti hafi staðið í stað á innanlandsmarkaði frá árinu 2010, þrátt fyrir að verðlag í landinu hafi hækkað og innlendur kostnaður hækkað mikið.

Segir neytendur hafa hagnast

Hann segir að tal um að aðgerðir í þágu sauðfjárbænda rýri kjör neytenda ekki ganga upp þegar horft sé til þeirrar staðreyndar að lambakjötið hefur lækkað í verslunum að raunvirði. „Neytendur hafa notið mikillar verðlækkunar á lambakjöti á undanförnum árum. Neytendur hafa hagnast mjög mikið. Við erum að selja lambakjöt á sömu krónutölu og árið 2010. Um hvaða aðra kjöttegund eða annan mat geturðu sagt það sama?“ Nú sé helst viðfangsefnið að verjast hruni í greininni.

Árshlutareikningur Sláturfélags Suðurlands var gefinn út í gær, þar sem farið var yfir afkomu á fyrri helmingi þessa árs. Hagnaður nam 129 milljónum króna samanborið við 305 milljónir króna í fyrra. Rekstrartekjur stóð í stað og voru 6,2 milljarðar króna. „Afkoma Sláturfélagsins versnaði milli ára en afurðahluti félagsins býr við afar erfið skilyrði.“ Fram kemur að fjárhagsstaða Sláturfélagsins sé traust.