Snowden birtist á fundi Pírata

Bandaríski uppljóstrarinn Edward Snowden ávarpaði Pírata í dag á aðalfundi flokksins sem fer fram í Valsheimilinu. Ávarpið fór fram gegnum vefmyndavél og var varpað á tjald í fundarsalnum en Snowden er staddur í Rússlandi þar sem hann fékk dvalarleyfi eftir að hafa flúið Bandaríkin.

Snowden talaði meðal annars um að ótti hafi gripið um sig í heiminum og verði til þess að allt sé gert tortryggilegt. Þessu þurfi að taka á. 

„Við þurfum að læra að umbreyta óttanum, hann má ekki stjórna ákvörðunum okkar,“ sagði Snowden. „Hvílíkir tímar sem við lifum. Við höfum aldrei haft það betra en það er eins og hvern dag séum við nær hamförum.“ 

Hann skaut föstum skotum að Donald Trump Bandaríkjaforseta. 

„Nú sjáum við forsetann í mínu landi tala niður til fjölmiðla [...] Trump hefur ekki sómakennd og hann hefur aldrei þekkt ást sem hann hefur ekki þurft að borga fyrir,“ sagði Snowden og uppskar hlátur. 

Aðspurður sagði Snowden að hann myndi þiggja íslenskan ríkisborgararétt hið snarasta ef hann stæði til boða. 

Snowd­en var grein­andi hjá banda­rísku þjóðarör­ygg­is­stofn­un­inni (NSA) er hann ljóstraði upp um ýmis leynigögn banda­rískra stofn­ana. Þar í landi á hann yfir höfði sér ákær­ur sem gætu orðið til þess að hann þyrfti að afplána allt að 30 ára fang­els­is­dóm. Í janúar ákváðu rúss­nesk stjórn­völd að fram­lengja dval­ar­leyfi Snowd­ens um tvö ár til viðbót­ar. 

Snowden var fagnað þegar honum var varpað upp á tjald. mbl.is/Ófeigur

• 1 blogg um fréttina

Bloggað um fréttina

• Jóhann Elíasson: PÍRATARNIR GEFAST EKKI UPP VIÐ AÐ REYNA AÐ FÁ GLÆPAMANNINN …