Grunnskólakennarastöður eru fullmannaðar í flestum grunnskólum landsins að því er fram kemur í niðurstöðum könnunar sem Samband íslenskra sveitarfélaga hefur gert. Af þeim 134 skólum sem tóku þátt í könnuninni sögðust 111 vera fullmannaðir, eða 83 af hundraði.
Þetta kemur fram á vef Sambands íslenskra sveitarfélaga. Þar segir að ómönnuð stöðugildi reyndust 23 talsins eða ein kennarastaða að meðaltali við þá skóla sem voru ekki fullmannaðir. Á heildina litið samsvarar þetta hlutfall innan við einu prósenti af þeim heildarfjölda stöðugilda sem ætluð eru kennurum í grunnskólum landsins.
Þá gegna leiðbeinendur 370 stöðugildum kennara af þeim liðlega 3.600 sem könnunin náði til og skiptust stöðugildin þannig að kennarar skipuðu 92,5 prósent stöðugilda en leiðbeinendur 7,5 prósent.