Stöðva viðskipti með pyntingartól

Einar Gunnarsson sendiherra
Einar Gunnarsson sendiherra Ljósmynd/Aðsend

Alþjóðabandalagi um pyntingalaus viðskipti hefur verið hleypt af stokkunum. Ísland gerðist í gærkvöldi aðili að bandalaginu með þátttöku Einars Gunnarssonar sendiherra. Þetta sameiginlega átak Evrópusambandsins, Argentínu og Mongólíu, með aðild alls 58 landa, miðar að því að stöðva viðskipti með varning sem beitt er við dauðarefsingar og pyntingar. Þetta kemur fram í tilkynningu. 

Til búnaðar sem er gerður til þess eins að valda kvölum og dauða teljast gaddakylfur, raflostsbelti, griparmar sem veita raflost, efnasambönd sem notuð eru við aftökur og tilheyrandi búnaður til þvingaðrar lyfjagjafar. Samkvæmt alþjóðalögum eru pyntingar bannaðar undir öllum kringumstæðum en þrátt fyrir það fer fram verslun með búnaðinn um allan heim.  

Pyntingartól.
Pyntingartól. Ljósmynd/Aðsend

„Þessar vörur þjóna engum tilgangi öðrum en að valda skelfilegum sársauka og drepa fólk. Við ættum aldrei að heimila verslun með þær eins og hvern annan varning. Nú grípum við til áþreifanlegra aðgerða til að stöðva þessi fyrirlitlegu viðskipti.“ Þetta er haft eftir Cecilia Malmström, viðskiptastjóra Evrópusambandsins, í tilkynningu. 

Löndin 58 um allan heim í Afríku, Ameríku, Evrópu og Asíu hafa samþykkt aðgerðir í fjórum liðum. Það er: að beita úrræðum til stýringar og takmörkunar útflutnings á þessum vörum; að veita tollyfirvöldum viðeigandi viðbúnað. Bandalagið mun koma á laggirnar vettvangi til að fylgjast með viðskiptaflæði, skiptast á upplýsingum og bera kennsl á nýjar vörur; að bjóða löndum heims tæknilegan stuðning við setningu og framkvæmd laga til að banna þessi viðskipti og í fjórða lagi að skiptast á aðferðum við skilvirka, kerfisbundna stýringu og framfylgd.

Þrátt fyrir að í gildi sé ströng löggjöf Evrópusambandsins um viðskipti með vörur sem nýttar eru til pyntinga og dauðarefsingr sem hefur þegar skilað árangri þarf meira til. „Hins vegar leggja framleiðendur og söluaðilar slíks varnings sig fram við að sneiða hjá lögunum. Af þeim sökum verður viðleitnin til að binda enda á viðskiptin því árangursríkari sem fleiri lönd banna þau,“ segir í tilkynningu. 

„Ég hef margoft hitt þolendur pyntinga – flóttafólk, samviskufanga, fanga sem bíða dauðarefsingar. Ég er sannfærð um að nýta megi viðskiptastefnur landa til að styrkja mannréttindi um allan heim. Því er mér það mikið gleðiefni að svo mörg lönd skuli taka þátt í yfirlýsingunni og ganga til liðs við bandalagið.“ Þetta er haft eftir Malmström viðskiptastjóra í tilkynningu. 

Pyntingartólk sem veitir fólki raflost.
Pyntingartólk sem veitir fólki raflost. Ljósmynd/Aðsend
mbl.is
Fleira áhugavert
Fleira áhugavert