Sveppur hefur verið áberandi í borginni að undanförnu, til dæmis á grænum svæðum og umferðareyjum. Hann heitir ullserkur eða ullblekill, en hefur einnig verið nefndur bleksveppur.
Þórólfur Jónsson, deildarstjóri Náttúru og garða hjá Reykjavíkurborg segir í Morgunblaðinu í dag, að sveppurinn sé mjög vel ætur. Hann þyki raunar fínn þegar hann er ungur, hvítur, en verði síðan óætur þegar hann eldist, verði eins og „blek“. Þórólfur kveðst hafa það á tilfinningunni að ullserkurinn sé að verða algengari í borginni en áður en hann hafi engar staðfestar upplýsingar um það.
Þórólfur varar fólk við að tína sveppinn of nálægt umferðargötum þar sem hann gæti innihaldið mengandi efni.