Loðnuvinnslan á Fáskrúðsfirði hefur tekið í notkun fullkomna hreinsistöð. Stöðin var ræst síðastliðinn miðvikudag.
Hún hreinsar allt vatn sem kemur frá fiskvinnslu fyrirtækisins, fita og fastefni er skilið frá affallsvatninu. Fitan er nýtt til lýsisgerðar og þurrefnisagnir fara í mjölvinnslu, að því er fram kemur í umfjöllun um hreinsibúnað þennan í Morgunblaðinu í dag .
„Þetta er algjör bylting umhverfislega og stórt skref inn í framtíðina. Með þessum búnaði erum við að skila frá okkur hreinu vatni, án fitu og þurrefna. Þetta er líka arðbært til lengri tíma litið,“ sagði Friðrik Mar Guðmundsson, framkvæmdastjóri Loðnuvinnslunnar. Verksmiðja fyrirtækisins er knúin rafmagni og því umhverfisvænni en væri hún knúin olíu.