Listræn ljósmóðir sem málar og skrifar

Inga María Hlíðar Thorsteinson hjúkrunarfræðingur og verðandi ljósmóðir stendur vaktina …
Inga María Hlíðar Thorsteinson hjúkrunarfræðingur og verðandi ljósmóðir stendur vaktina á Landspítalanum milli þess sem hún málar. mbl.is/Kristinn Magnússon

„Nei alls ekki, þetta er bara áhugamál,“ segir Inga María Hlíðar Thorsteinson hjúkrunarfræðingur spurð um myndlist sína en hún hefur málað og haldið myndlistarsýningu þrátt fyrir að hafa í nægu að snúast bæði í námi og starfi sem hjúkrunarfræðingur og nú verðandi ljósmóðir.

„Þegar ég var lítil sótti ég eitt sumarið frístundanámskeið í myndlist og ég valdi alltaf myndlist í vali í skóla ef ég gat en það var aldrei neitt meira en það hjá mér. Áhuginn að mála vaknaði í raun ekki fyrr en ég var komin í hjúkrunarfræðinám og þá kannski fyrst og fremst til að hjálpa mér í gegnum prófin eða svona til að byrja með,“ segir hún en hjúkrunarfræði, líkt og allt nám í heilbrigðisvísindum, er mjög krefjandi og getur tekið bæði á líkama og sál.

„Þegar ég var alveg að gefast upp á svokölluðum numerus clausus í upphafi námsins lofaði ég sjálfri mér að ég myndi mála mynd að yfirstaðinni próftörn. Eitthvað sem ég gæti þá gefið mér tíma í og gert fyrir sjálfa mig.“

Í kjölfarið segir Inga María að hún hafi sett upp auðan striga sem varð henni hvatning, eins konar gulrót, sem kom henni í gegnum próftörnina.

„Þetta komst svo upp í hefð hjá mér að mála mynd í hvert skipti sem ég kláraði önn í náminu,“ segir hún og tekur það jafnframt fram að þetta hafi verið í fyrsta sinn sem hún hafi tekið sig til og málað, en af myndunum hennar að dæma mætti ætla að hún hafi málað myndir alla sína ævi.

Inga María seldi málverk til að fjármagna Kambódíuferð.
Inga María seldi málverk til að fjármagna Kambódíuferð.


Inga María er hógvær og segist ekki hafa mikla teiknihæfileika heldur skapi hún það sem er á striganum eftir ljósmyndum annarra.

„Ég get ekki sagt að ég hafi hugmyndaflugið eða hæfileikann til að mála hvað sem kemur upp í kollinn á mér. Þetta eru myndir sem ég mála eftir ljósmyndum og reyni því bara að herma eftir því sem ég sé á ljósmyndinni,“ segir Inga María en hún hélt fyrir tveimur árum myndlistarsýningu til styrktar mannúðarmálum.

„Mér finnst óþægilegt að vera að selja verkin mín því ég er ekki alveg með höfundarréttinn á hreinu. Þetta er málað eftir ljósmyndum annarra en þar sem verkin voru seld til góðgerðarstarfs lét ég verða af því að halda sýningu.“

Verkin hennar seldust mjög vel og safnaði hún nokkur hundruð þúsund krónum til að kosta ferð sína sem hún fór í ásamt vinkonum sínum í náminu til Kambódíu þar sem þær sinntu hjálparstarfi.

„Það var mjög áhugaverð lífsreynsla og við fengum að kynnast allt öðrum menningarheimi. Ég hefði kannski viljað geta gert meira gagn úti en þetta var góður skóli í því hvernig koma skal að ólíkum aðstæðum og gera gagn.“

Vissi snemma hvað hún vildi

Íslenska náttúran er eitt af viðfangsefnum Ingu Maríu.
Íslenska náttúran er eitt af viðfangsefnum Ingu Maríu.


Inga María hefur alltaf vitað hvað hún vildi gera í lífinu og að loknu hjúkrunarfræðinámi árið 2016 sótti hún strax um að komast inn í ljósmæðranámið en aðeins 10 nemar eru teknir inn í námið á hverju ári.

„Ætli það sé ekki reynsla mín í gegnum lífið sem hefur leitt mig á þessa braut. Foreldrar mínir misstu tvíbura þegar móðir mín var mjög langt gengin og síðan var ég óvart viðstödd fæðingu bróður míns, sem er tólf ára í dag. Þá vissi ég nákvæmlega hvað ég ætlaði að verða,“ segir hún og bætir því við að fæðing sé oftast ein mesta gleðistund í lífi fólks. „Þetta getur líka verið mjög erfitt og ég vil vera til staðar fyrir konur og eftir atvikum maka þeirra á þessum tímapunkti í lífinu.“

Ljósmóðir er að hennar sögn oftast fyrsta snerting barnshafandi kvenna við heilbrigðiskerfið en ljósmæður sinna konum á meðgöngu, í fæðingu og allt að tveimur vikum eftir fæðingu.

„Þá er alltaf ljósmóðir viðstödd fæðingu en síðan er eftir atvikum læknir viðstaddur ef eitthvað óvænt kemur upp á eða talin þörf á.“

Það sem skiptir Ingu Maríu mestu máli er að vera með og sinna sínum sjúklingum.

Málar og skrifar

Inga María sækir innblástur víða, m.a. í hugarheim J. R. …
Inga María sækir innblástur víða, m.a. í hugarheim J. R. R. Tolkien.


Spurð hvernig hún fái hugmyndir að málverkum sínum og hvenær henni gefst færi á að mála þegar hún er í fullu ljósmæðranámi og að taka vaktir sem hjúkrunarfræðingur segir hún listina vera hálfgerða hvatvísishugmynd.

„Ég fæ oft þörf fyrir að mála eitthvað og ef ég er í fríi daginn eftir eða á kvöldvakt byggist oft upp svona tilhlökkun yfir daginn og ég byrja þá að mála um kvöldið. En stundum reyni ég að mála en ekkert gerist og það eina sem kemur frá mér er bara eitthvað hræðilegt. Einhverra hluta vegna verð ég bara að komast í gírinn,“ segir Inga María og viðurkennir að hún noti listina til að kúpla sig út eftir langan vinnudag.

„Þegar ég er búin að vera alveg á fullu í nokkra daga fæ ég stundum þessa hugdettu; að nú þurfi ég að mála mynd. Ég mála þá oftast á kvöldin og nóttunni enda get ég ekki málað um hábjartan dag og verið að svara í símann eða eitthvað álíka. Þetta verður að gerast í næði,“ segir hún og bendir jafnframt á að hún noti ritlistina einnig til að fá útrás fyrir sköpunargleði sína.

„Síðastliðið ár hef ég skrifað pistla inn á Rómur.is þar sem ég hef fengið tækifæri til að setja á blað vangaveltur mínar um málefni líðandi stundar og hugleiðingar mínar um lífið og tilveruna.“

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Fleira áhugavert
Fleira áhugavert