Ríkislögreglustjóri hefur í samráði við lögreglustjórann á Suðurlandi lýst yfir óvissustigi almannavarna vegna úrkomu og vatnavaxta á Mýrum í Austur Skaftafellssýslu. Þjóðvegur 1 er í sundur austan við Hólmsá á Mýrum í Hornafirði. Brúin yfir Steinavötn í Suðursveit er lokuð fyrir umferð stórra bíla.
Þetta kemur fram í tilkynningu lögreglunnar á Facebook.
„Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila,“ segir í tilkynningu.
Þá segir í tilkynningu frá Vegagerðinni að Hólmsá á Mýrum, sem er skammt vestan við Höfn í Hornafirði, flæði yfir þjóðveginn. Ekki sé útlit fyrir að vegurinn opnist fyrr en í fyrsta lagi á sunnudag. Verið sé að kanna aðstæður við Steinavatnabrú í Suðursveit.
Þá sé vegur 966 í Breiðdal í sundur vegna vatnsskemmda, alveg innst í dalnum - og eins er ófært upp í Laka og Þakgil vegna vatnsskemmda. Vegir hafa skemmst víðar vegna vatnavaxtanna s.s. þar sem runnið hefur úr vegköntum og fólk er því beðið að sýna aðgát við akstur.