Teiknimyndir frá Tulipop á YouTube

Tulipop er komið á YouTube.
Tulipop er komið á YouTube.

Íslenska hönnunarfyrirtækið Tulipop setti í dag í loftið YouTube-rás sem inniheldur stuttar teiknimyndir byggðar á hinum litríka Tulipop ævintýraheimi og persónunum sem þar búa.

Þetta kemur fram í tilkynningu.

Teiknimyndirnar eru framleiddar í samstarfi við bandaríska fyrirtækið Wildbrain, sem er leiðandi í framleiðslu afþreyingarefnis fyrir vefmiðla. Wildbrain sér einnig um að stýra YouTube-rásinni á heimsvísu.

Handrit þáttanna skrifar handritshöfundurinn Tobi Wilson í samstarfi við Signýju Kolbeinsdóttur, yfirhönnuð Tulipop og skapara Tulipop heimsins. Tobi hefur skapað sér nafn í heimi teiknimynda, sem einn helsti handritshöfundur hinnar vinsælu þáttaraðar The Amazing World of Gumball, sem sýnd er á Cartoon Network.

Tónlistin í þáttunum er frumsamin af Herdísi Stefánsdóttur og James Newberry, og Ólafur Darri Ólafsson leikari ljær einni aðalpersónu þáttanna, Fred, rödd sína.

Fyrstu þrjár teiknimyndirnar eru nú þegar aðgengilegar á YouTube-rásinni, en fleiri þættir munu bætast við á næstu vikum.

„Þetta er stór dagur fyrir okkur í Tulipop og við erum alsæl með að geta nú leyft Tulipop-aðdáendum að kynnast skringilegum persónum ævintýraheimsins betur í gegnum teiknimyndir sem við vonum að muni gleðja krakka á öllum aldri,“ segir Helga Árnadóttir, framkvæmdastjóri Tulipop, í tilkynningunni.

RÚV hefur tryggt sér sýningarétt á þáttaröðinni og mun láta þýða þættina og talsetja á íslensku í samstarfi við Tulipop og sýna í sjónvarpi síðar á árinu.

mbl.is
Fleira áhugavert
Fleira áhugavert