Innlent | mbl | 12.10.2017 | 15:03 | Uppfært 16:12

„Ekki vaða áfram yfir einn aðila“

Þjórsárver. mbl.is/Brynjar

„Þarna er gengið freklega á okkar hlut sem stjórnvalds,“ segir Egill Sigurðsson, oddviti Ásahrepps. Eins og mbl.is greindi frá í gær íhugar hreppsnefndin að leggja fram stjórnsýslukæru á hendur umhverfisráðuneytinu vegna fyrirhugaðrar stækkunar friðlands í Þjórsárverum. Ályktun þess efnis var samþykkt samhljóða á hreppsnefndarfundi Ásahrepps í gær, miðvikudag.

Egill segir að kosningafnyk leggi af ákvörðuninni og tekur fram að þetta sé ekki í fyrsta sinn sem ráðherrar, rétt fyrir kosningar, taki ákvörðun sem þessa.

Frétt mbl.is: Íhuga að leggja fram stjórnsýslukæru

Það sem kjörnir fulltrúar Ásahrepps finna að fyrirhugaðri stækkun, sem þeir eru í grunninn sammála, eru skilmálar friðlýsingarinnar; hvernig ríkið hyggst halda utan um svæðið.

Egill segir að merkingum sé verulega ábótavant og engin stjórn sé höfð á umferð inn og út af svæðinu. Þeir sem heimsæki svæðið, flestir útlendingar, viti þar af leiðandi ekki hvaða hömlur gildi á friðlýstu svæði. Úr því verði að bæta og það verði ekki gert nema samningur sé gerður þar að lútandi.

Frétt mbl.is: Friðlandið stækkað umtalsvert

Egill segir að áður en ráðherra hafi ákveðið stækkunina hafi málið verið í góðum farvegi og að góð samtöl hafi átt sér stað milli ráðuneytis og sveitarfélaga. Allir séu sammála um að stækka eigi svæðið en það sé mat Ásahrepps að þeirri stækkun verði að fylgja fjármagn og áætlun um það hvernig standa eigi að málum. Hann upplifir að verið sé að nýta stækkun friðlandsins í pólitískum leik.

„Menn eiga að vinna að þessu málum saman; stofnanir, ráðuneyti og sveitarfélög. Ekki vaða áfram yfir einn aðila málsins. Við viljum bara að þetta sé gert almennilega,“ segir Egill.

Hann staðfestir að hreppurinn sé að láta skoða, út frá gildandi náttúruverndarlögum, hvort vert sé að leggja fram stjórnsýslukæru vegna málsins. Niðurstaða þeirrar athugunar liggi ekki fyrir.

Uppfært kl. 16:11. Í fyrri útgáfu fréttarinnar var birt rangt kort af áformum um stækkun friðlandsins í Þjórsárverum. Kortið hér að neðan er hið rétta.