Lögreglustjóri mátti þola áreitni

Sigríður Björk mátti sem ungur skattstjóri og síðar sýslumaður þola …
Sigríður Björk mátti sem ungur skattstjóri og síðar sýslumaður þola ýmislegt. mbl.is/Eggert Jóhannesson

Sigríður Björk Guðjónsdóttir, lögreglustjóri á höfuðborgarsvæðinu, tekur þátt í samfélagsmiðlabyltingunni #MeToo, þar sem konur greina frá því að þær hafa orðið fyrir kynferðislegri áreitni og ofbeldi.

Hún birti færslu á Facebook-síðu sinni nú í kvöld þar sem hún segir að hún hafi mátt þola „allt það helsta sem konur geta átt á hættu að verða fyrir þegar þær feta sig inn í heim karlanna.“ Sigríður var þá ungur skattstjóri og síðar sýslumaður á Vestfjörðum. Hún segir að þrátt fyrir að sýslumenn teljist nokkuð valdamiklir þá hafi völd hennar ekki verið meiri en þetta. „Kannski átti það þátt í að skapa mér skráp og nokkurn vott af harðfylgni en ég hefði þó gjarnan viljað vera laus við þessa reynslu.“

Sigríður tekur þó fram að hún hafi átt gott samstarf við flesta karlmenn í gegnum tíðina, en staðreyndin sé engu að síður sú að þeir eigi ekki auðvelt með að setja sig í spor kvenna.

Áreitni sem viðurkennd hegðun þarf að líða undir lok

Hún segir þá umræðu sem skapast hefur í kjölfar uppljóstrana um kynferðislega áreitni kvikmyndaframleiðandans Harvey Weinstein fáa hafa látið ósnortna. Afhjúpunin hafi hrundið af stað bylgju þar sem konur hvarvetna í heiminum, á öllum aldri, lýsa ógnandi framkomu karla í sinn garð. Hlutskipti sem þær ætla ekki lengur að sætta sig við.

„Það er hlutverk lögreglunnar að tryggja öryggi borgaranna og því miður er öryggi kvenna ógnað mjög oft án þess að lögreglan geti haft þar nokkur áhrif á. Til að konur geti búið við þá öryggistilfinningu sem þær eiga fulla heimtingu á, þá þurfa fleiri að koma að. Fyrst og fremst þá þarf áreitni gegn konum sem viðurkennd hegðun að líða undir lok.“

Sigríður segir konur í dag hvergi geta verið alveg öruggar um að verða ekki fyrir óumbeðnum og óviðeigandi athugasemdum eða jafnvel snertingum. Þær geti átt von á slíku inni á heimilum, á vinnustöðum og á opinberum stöðum. Karllægir vinnustaðir og umhverfi þar sem karlar fara með völdin séu á meðal þeirra staða þar sem konur þurfa sérstaklega að vera varar um sig.

Lögreglan ekki undanskilin

„Því miður er lögreglan sem vinnustaður þar ekki undanskilin. Lengst af voru stjórnendur í lögreglunni nær allir karlar og konur voru fáar í hópi lögregluþjóna. Ég get vel ímyndað mér að það hafi ekki alltaf verið auðvelt að vera lögreglukona á þessum tíma. Við höfum heyrt slíkan vitnisburð, bæði nýverið í tengslum við #metoo umræðuna hér á landi, og í frásögnum lögreglukvenna í rannsóknum sem gerðar hafa verið á kynferðislegri áreitni innan lögreglunnar.

Í skýrslu, sem birt var árið 2013, kemur fram að 31% lögreglukvenna hafi orðið fyrir kynferðislegri áreitni af hálfu yfirmanna eða samstarfsmanna. Þetta er fullkomlega ólíðandi ástand. Nú hefur verið komið á fót sérstöku fagráði sem þeir sem verða fyrir svona, jafnt lögreglukonur sem karlar, geta leitað til. Þá hefur lögreglan á höfuðborgarsvæðinu sett af stað framhaldsrannsókn á vinnustaðarmenningu embættisins.“

Sigríður segir jafnara hlutfall kynjanna, bæði í stjórnunarstöðum og í hópi lögreglumanna, að sínu mati lykilþáttur í því að breyta megi viðteknum viðhorfum og samskiptavenjum innan embættisins.

„Konur eru í dag aðeins 22% lögreglumanna hjá lögreglunni á höfuðborgarsvæðinu. Konum fer samt hratt fjölgandi. Í hópi lögreglumanna 60 ára og eldri eru aðeins 3% konur en í aldurshópnum 20-29 ára eru þær orðnar ríflega fjórðungur. Þá er gaman að segja frá því að hlutfall kynjanna, í hópi þeirra sem nú nema lögreglufræði við Háskólann á Akureyri, er svo til jafnt.“

 

mbl.is
Fleira áhugavert
Fleira áhugavert