Mikil tæring tefur rannsóknir Hafró

Mikil tæring hefur komið í ljós í leiðslum, veltitanki og á vinnuþilfari rannsóknaskipsins Bjarna Sæmundssonar. Skipið verður úr leik í einhverjar vikur af þessum sökum, jafnvel fram að áramótum, og hafa tafir orðið á rannsóknaverkefnum Hafrannsóknastofnunar.

Skipið var upphaflega smíðað í Vestur-Þýskalandi 1970. Fyrr í haust bilaði stýritölva fyrir eina vél skipsins en það var lagað til bráðabirgða. Þá tók tíma að finna varahluti og urðu tafir á loðnuleiðangri og leiðangri sem var á áætlun þar á eftir.

Sigurður Guðjónsson, forstjóri Hafrannsóknastofnunar, segir mjög brýnt að sem fyrst verði tekin ákvörðun um nýtt rannsóknaskip. Ekki sé lengur hægt að treysta á Bjarna og fjármagni sem varið sé í viðgerðir á svo gömlu skipi sé ekki sérstaklega vel varið.

Fyrir um viku átti að leggja af stað í margþættan leiðangur þar sem m.a. átti að kanna ástand rækju og smásíldar og gera umhverfisrannsóknir í fjörðum og veiðarfæratilraunir. Þegar hefur verið leigt skip til rækjurannsókna og hluta umhverfisrannsóknanna. Hægt er að mæla síld fram eftir vetri og stefnt er að því að það verði gert í byrjun næsta árs.

Þessar ráðstafanir hafa í för með sér viðbótarkostnað vegna leigu skips, auk kostnaðar við viðgerðina.