Fjölskyldan frá Gana, móðirin Mercy Kyeremeh og drengir hennar þrír, Godwin fimm ára, Emmanuele fjögurra ára og nýfætt barn hennar, fengu í dag dvalarleyfi á grundvelli mannúðarsjónarmiða. „Þetta er mikið gleðiefni,“ segir Magnús Davíð Norðdahl hdl. lögmaður fjölskyldunnar.
Í lok september voru fjölskyldunni gefnir 30 dagar til að yfirgefa landið þrátt fyrir að yfirlæknir á geðdeild Landspítalans taldi brottvísunina geta „valdið Mercy og fjölskyldu hennar óafturkræfu tjóni“. Hún væri talin í sjálfsvígshættu.
Kærunefnd útlendingamála féllst á endurupptökubeiðni sem send var nefndinni þann 29. september í kjölfar þess að Alþingi samþykkti breytingar á útlendingalögum sem rýmkuðu heimildir tímabundið til að veita dvalarleyfi á grundvelli mannúðarsjónarmiða.