Ástæðulaust að aflýsa fluginu

Isavia skilur ekki hvers vegna Air Berlin ákvað að aflýsa flugi sínu til Íslands í gærkvöldi. „Við ítrekuðum það við flugfélagið að þessar aðgerðir snerust bara að þessari tilteknu vél. Við sjáum enga ástæðu til þess að aflýsa flugi á þennan hátt,“ segir Guðni Sigurðsson, upplýsingafulltrúi Isavia.

Frétt af mbl.is

Rándýr aukanótt í Berlín

Fyrirtækið hefur verið í samskiptum við Air Berlin undanfarið eftir að hafa kyrrsett flugvél flugfélagsins í síðustu viku en engin niðurstaða er komin í málið enn þá. Guðni veit ekki til þess að flugvélar Air Berlin hafi verið kyrrsettar á öðrum flugvöllum.

Air Berlin hefur ekki flogið til Íslands síðan á fimmtudagskvöld. Eftir að vélin sem átti að fara til Düsseldorf var kyrrsett fór ein vél flugfélagsins til Berlínar sama kvöld.

Frétt af mbl.is

„Boltinn er hjá Air Berlin“

Frá Flugstöð Leifs Eiríkssonar. mbl.is/Ómar Óskarsson

Íslendingar sem áttu að fljúga með Air Berlin til Íslands í gærkvöldi kvörtuðu yfir lélegri upplýsingagjöf Isavia eftir að í ljós kom að fluginu hafði verið aflýst með skömmum fyrirvara.

Guðni segir að Isavia tilkynni á vef Keflavíkurflugvallar, sem er þeirra upplýsingavefur, ef flugi er aflýst um leið og upplýsingar koma frá flugþjónustufyrirtækinu sem vinnur fyrir hvert flugfélag.

Hann bendir á að lesa megi um réttindi farþega á vef Samgöngustofu þegar kemur að málum sem þessum.

Keflavíkurflugvöllur. Ljósmynd/Isavia

Skýr lagaheimild 

Air Berlin telur aðgerðir Isavia ólögmætar og að sögn Guðna hefur flugfélagið talað um þýsku greiðslustöðvunarlögin í viðræðum sínum við Isavia. „Það er mjög einfalt mál að þýsk lög gilda ekki á Íslandi. Á Íslandi gilda íslensk lög og það er skýr lagaheimild til rekstaraðila flugvallar að kyrrsetja flugvél ef gjöld hafa ekki verið greidd,“ greinir Guðni frá og bendir á grein 136 í lögum um loftferðir.

Hann bendir á að einu sinni áður hafi loftfar verið kyrrsett hérlendis, eða árið 2012, og það mál hafi farið fyrir héraðsdóm á Íslandi. „Það var skýr niðurstaða að það væri heimild í lögum til að gera þetta.“

Spurður hvort Air Berlin hafi hótað að höfða mál gegn Isavia kveðst hann ekki hafa heyrt af því en telur möguleika á að flugfélagið fari þá leið.  

• Blogga um frétt