Útgerðin sé í Eyjum

Náist samstaða um útfærslur ættu fulltrúar Vestmannaeyjabæjar og samgönguráðuneytisins að geta á næstu dögum skrifað undir viljayfirlýsingu um yfirtöku bæjarins á rekstri Herjólfs.

Þetta segir Elliði Vignisson, bæjarstjóri í Eyjum, sem í gær fundaði ásamt sínu fólki með fulltrúum Vegagerðarinnar um rekstur ferjunnar, nýs skips sem er væntanlegt til landsins næsta sumar.

Það er lykilatriði að stjórn á útgerð Herjólfs sé í höndum heimamanna, segir Elliði Vignisson í Morgunblaðinu í dag. Þá kröfu segir hann þunga að ferðum ferjunnar milli Eyja og Landeyjahafnar sé fjölgað, en þær eru sex á dag yfir sumarið en þrjár til fimm á veturna.