„Erfitt og sorglegt“

Eva Björk Valdimarsdóttir segir að mistök hafi valdið því að starf hennar sem dómkirkjuprestur var afturkallað.

Frétt af mbl.is

Skipun Evu afturkölluð

Á facebooksíðu sinni segir Eva Björk að mistökin hafi falist í því að kjörnefndin sem kaus hana í embættið hafi átt að vera kosin á sérstökum safnaðarfundi.

„Svo miklir annmarkar munu hafa verið á kosningu kjörnefndar að hægt var að efast um réttmæti skipunar minnar í embætti prests í Dómkirkjunni. Það er auðvitað erfitt og sorglegt að svona hafi farið. Það er von mín að vinnubrögð verði vandaðri í framtíðinni,“ segir Eva Björk.

Hún bætir við að boðað verði til safnaðarfundar þar sem fólk geti boðið sig fram til starfa í kjörnefndinni eða kosið sína fulltrúa til þeirra starfa. Í kjölfarið verði embættið auglýst að nýju.

„Ég aðhyllist sjálf það sjónarmið að fólkið í sókninni eigi að geta haft áhrif á störf síns safnaðar og á val presta. Það er gott að standa vörð um það,“ segir hún.

„Ég taldi ekki vænlegt að setjast í embætti undir þessum kringumstæðum. Ég vil þjóna kirkjunni í kærleika og sátt, á þeim vettvangi sem Guð leiðir mig. Ég er spennt fyrir því að takast á við ný verkefni í Reykjavíkurprófastsdæmi vestra og vinna með öllu því frábæra fólki sem þar er.“

Hún þakkar jafnframt fyrir stuðninginn, hvatninguna og góðu ráðin sem hún hafi fengið að undanförnu.

• Blogga um frétt