„Þetta eru konur sem áttu sér drauma, vonir og þrár eins og hver önnur kona á Íslandi. En þær eru í þessum aðstæðum og vita ekkert hvað framtíðin ber í skauti sér. Við viljum hjálpa þeim,“ segir Stella Samúelsdóttir, framkvæmdastýra UN Women á Íslandi.
Stella fór ásamt landsnefnd UN Women og þeim Elízu Reid forsetafrú og Evu Maríu Jónsdóttur, verndara UN Women á Íslandi, til Jórdaníu í september síðastliðnum. Þar kynntu þær sér griðastaði UN Women í Zaatari-flóttamannabúðunum en þar dveljast konur og stúlkur á flótta frá Sýrlandi. Nú er hafin neyðarsöfnun fyrir þessar konur. Landsmenn eru hvattir til að senda SMS-ið KONUR í númerið 1900 til að leggja sitt af mörkum.
Um 80 þúsund Sýrlendingar dvelja í Zaatari eftir að hafa flúið stríðsátök og ofbeldi í heimalandi sínu. Búðirnar eru þær næststærstu í heiminum og jafnframt eru þær fjórða fjölmennasta borg Jórdaníu. Konur og börn eru um 80% íbúa í Zaatari og eiga erfitt uppdráttar í búðunum. Á griðastöðunum eru konur öruggar, fá atvinnutækifæri, menntun og daggæslu fyrir börn sín.
„Konurnar í flóttamannabúðunum eru berskjaldaðar gagnvart ofbeldi og öðru. Griðastaðirnir veita þeim vernd, öryggi og atvinnu. Raddir þeirra heyrast mjög sjaldan en við viljum hlusta á raddir þeirra. Þær eru oft fyrirvinna fjölskyldu sinnar en flest störf í flóttamannabúðunum, 5.000 talsins, eru unnin af körlum. Á griðastöðunum fá þær tækifæri til að vinna,“ segir Stella.
„Margar hverjar hafa upplifað hræðilega hluti, misst maka, fjölskyldur og börn, hluti sem enginn ætti að þurfa að upplifa. Þær búa í litlum gámum og þessir griðastaðir hjálpa þeim að komast út úr þunglyndi og einangrun, veita þeim trú og von fyrir framtíðina.
Það veit enginn hvað þær verða lengi þarna en á meðan þær komast á griðastaðina þurfa þær ekki að sitja og bíða. Við viljum gefa fleiri konum tækifæri á að fá atvinnu og þessa vernd. Öruggt skjól og tækifæri á nýju upphafi. Það eru hundruð kvenna á biðlista og sá peningur sem safnast mun renna til að fleiri konur geti notið þessa,“ segir hún.