Rafleiðni í Jökulsá á Fjöllum og rennsli í ánni fer minnkandi. Ekki er vitað nákvæmlega hver upptökin eru en sennilegt er að jarðhitavatnið sem mælst hefur undanfarnar vikur eigi upptök vestar í Vatnajökli, hugsanlega í Bárðarbungu þar sem jarðhiti hafi aukist undanfarin misseri.
„Útrennslið hefur náð hámarki,“ segir Óðinn Þórarinsson framkvæmdastjóri athugana- og tæknisviðs Veðurstofu Íslands. Hann segir líklegt að upptökin séu úr katli í Bárðarbungu sem tæmist smám saman en tekur fram að frekari athuganir þurfi.
Ekki hefur verið hægt að fara eftirlitsflug yfir Bárðarbungu vegna veðurs og óvíst hvenær af því verður. Stefnt var að flugi í dag en því var slegið á frest. Síðasta sunnudag voru teknar ljósmyndir úr flugvél sem sýndu engin sérstök ummerki um að aukið rennsli jarðhitavatns komi úr Gengissigi í Kverkfjöllum.