Veitur ohf. hafa sótt um leyfi til að koma fyrir stóru upplýsinga- og kynningarskilti á vegg aðveitustöðvar rafmagns við Borgartún.
Skiltið verður 126 fermetrar að stærð og mun snúa að Kringlumýrarbraut. Um er að ræða heilan flöt á álramma en þetta verður hvorki ljósaskilti né flettiskilti.
Afgreiðslu málsins var frestað í umhverfis- og skipulagsráði sl. miðvikudag. Það kemur sér illa fyrir Veitur, því til stóð að koma þarna fyrir fráveituauglýsingu, Martröð í pípunuum, í tilefni þemadaga fráveitu sem standa yfir í tengslum við alþjóðlega klósettdaginn, sem er 19. nóvember næstkomandi, að því er fram kemur í Morgunblaðinu í dag.