Aðgerðum lögreglu er lokið á Holtavörðuheiði en þrír slösuðust þar fyrr í dag þegar sjö bílar lentu í árekstri. Þeir sem slösuðust voru fluttir á sjúkrahúsið á Akranesi eða á heilsugæslustöðina í Borgarnesi en ekki er talið að meiðsli þeirra séu alvarleg.
Holtavörðuheiði er lokuð og verður ekki opnuð í kvöld en hjáleið er um Laxárdalsheiði og Bröttubrekku eða Heydal.
Aðrir en þeir sem slösuðust voru fluttir í fjöldahjálparstöð Rauða krossins í Borgarnesi. Þar hefur öllum farþegum bíla sem lentu í árekstrinum verið veittur sálrænn stuðningur frá sjálfboðaliðum Rauða krossins í Borgarfirði.
Björgunarsveitin Brák flutti erlenda ferðamenn og Íslendinga í fjöldahjálparmiðstöðina sem er til húsa í Menntaskóla Borgarfjarðar.