Mál Aldísar Hilmarsdóttir verður að öllum líkindum endurflutt í lok þessarar viku. Verði það gert verður dómur kveðinn upp í málinu síðar í desember.
Þetta segir Arnfríður Einarsdóttir héraðsdómari í svari við fyrirspurn mbl.is.
Ástæðan fyrir endurflutningnum er sú að dómur hefur ekki verið kveðinn upp í málinu átta vikum eftir að aðalmeðferð lauk.
Aldís er fyrrverandi yfirmaður fíkniefnadeildar lögreglunnar á höfuðborgarsvæðinu. Hún stefndi íslenska ríkinu vegna ákvörðunar Sigríðar Bjarkar Guðjónsdóttur, lögreglustjóra á höfuðborgarsvæðinu, um að færa hana til í starfi.
Arnfríður segir endurflutning á málinu nauðsynlegan þegar tafir hafi orðið á dómsuppsögu en ástæðan fyrir þeim er annir dómarans í embætti.