Málflutningur í málum Ástráðs Haraldssonar og Jóhannesar Rúnars Jóhannssonar gegn íslenska ríkinu vegna skipunar Landsréttardómara fer fram í Hæstarétti á þriðjudaginn í næstu viku. Ríkið var í héraðsdómi í báðum málunum sýknað af bótakröfu þeirra Ástráðs og Jóhannesar, en fram kom í dóminum að stjórnsýslumeðferð Sigríðar Á. Andersen dómsmálaráðherra við skipunina hafi ekki verið í samræmi við ákvæði laga um dómstóla.
Segir í dómnum að meðferð ráðherrans hafi heldur ekki verið í samræmi við skráðar og óskráðar reglur stjórnsýsluréttarins um rannsókn máls, mat á hæfni umsækjenda og innbyrðis samanburð þeirra.
Í dómnum segir enn fremur að telja verði að meðferð ráðherrans á umsóknum um embætti dómara Landsréttar, og það mat sem hún hafi lagt á umsóknirnar, hafi „verið haldin slíkum annmörkum að ekki séu forsendur til að fullyrða hvort ráðherra hafi lagt til skipun 15 hæfustu umsækjendanna til Alþingis.“
Hins vegar er tekið fram að Ástráði tókst ekki að sýna fram á „að hann hefði verið skipaður dómari við Landsrétt ef meðferð málsins hefði verið í samræmi við ákvæði laga nr. 50/2016 og þær reglur stjórnsýsluréttarins sem vísað er til [...]“
Ástráði hafi þá heldur ekki tekist að sýna fram á að hann hafi beðið fjárhagslegt tjón vegna ákvarðana ráðherra. Var ríkið því sýknað af kröfu hans.
Sigríður sagði í samtali við mbl.is eftir að dómar héraðsdóms lágu fyrir að hún væri „hugsi yfir þeim áfellisdómi sem hæfisnefnd um dómaraefni er að fá í þessum dómi.“ Þá sagði hún að í dóminum fælist veruleg gagnrýni á dómnefndina,en í honum er að nokkru leyti tekið undir þá skoðun ráðherra að annmarkar hafi verið á mati á hæfni umsækjenda. „Þrátt fyrir að þessir annmarkar hafi verið á umsögn dómnefndarinnar er ekki þar með sagt að ráðherra hafi verið sjálfsvald sett hvernig hún hagaði meðferð málsins í framhaldinu,“ sagði Sigríður.
Ástráður sendi fjölmiðlum tilkynningu eftir að dómur héraðsdóms lá fyrir og sagðist ætla að áfrýja dóminum.