Einar Þór ráðinn aðstoðarritstjóri DV

Einar Þór Sigurðsson hefur verið ráðinn aðstoðarritstjóri miðla Frjálsrar fjölmiðlunar, bæði netmiðla og DV. Þetta kemur fram í tilkynningu frá félaginu.

Einar hóf störf hjá DV sem blaðamaður í fréttadeild vorið 2007 en skömmu áður hafði hann lokið námi í fjölmiðlafræði við Háskólann á Akureyri. Einar hefur starfað fyrir net- og blaðaútgáfu DV allar götur síðan. Einar var vaktstjóri hjá DV árin 2010 til 2014 að hann varð fréttastjóri. 

Í vor varð hann aðstoðarritstjóri DV.is og Pressunnar en tekur nú til starfa fyrir alla miðla Frjálsrar fjölmiðlunar ásamt Kristjóni Kormáki Guðjónssyni sem ráðinn var aðalritstjóri miðla Frjálsrar fjölmiðlunar á dögunum.

Í tilkynningunni er haft eftir Einari að hann hlakki til verkefnisins framundan: „Það eru spennandi tímar í vændum hjá fyrirtækinu og ég hlakka mikið til að takast á við þær áskoranir sem fram undan eru. Ég þakka eigendum fyrirtækisins það traust sem mér er sýnt og mun leggja mitt af mörkum til að gera góða fjölmiðla enn betri í þágu okkar fjölmörgu lesenda. Hjá fyrirtækinu starfar hæfileikaríkt fólk og ég hlakka til komandi verkefna.“

Á föstudag var greint frá því að Björn Þórir Sigurðsson hafi verið ráðinn til Frjálsrar fjölmiðlunar. Hann mun sinna þróunarvinnu fyrir félagið, bæði hvað varðar netmiðla og blað. 

• Blogga um frétt