Stal símum og herrailmvatni

Karlmaður var í dag dæmdur í fjögurra mánaða fangelsi og ævilöng svipting ökuréttinda hans áréttuð vegna þjófnaðar og umferðarlagabrots.

Maðurinn var dæmdur fyrir að brjótast inn í húsnæði við Bíldshöfða í Reykjavík í júní í sumar og stela þaðan þremur farsímum, úri og kveikjuláslyklum og fyrir að stela herrailmvatni að söluverðmæti 9.990 krónur í verslun Hagkaups í Smáralind í Kópavogi í ágúst.

Einnig var hann dæmdur fyrir að aka sviptur ökuréttindum og ófær um stjórna bifreiðinni, sem hann ók, með öruggum hætti vegna áhrifa ávana- og fíkniefna.

Maðurinn á nokkurn sakaferil að baki sem nær aftur til ársins 1995. Meðal annars hefur honum verið gerð refsing fyrir bæði ítrekuð auðgunarbrot og ítrekuð brot gegn umferðarlögum.

• Blogga um frétt