Það er skammarlegt að í kerfi sem meðal annars á að sjá um að vernda þolendur ofbeldis þrífist ofbeldi, áreitni og mismunun. Gera þarf breytingu þar að lútandi. Þetta er meðal þess sem kemur fram í yfirlýsingu frá Femínistafélaginu Auði, nýstofnuðu femínistafélagi stúdenta við lagadeild Háskóla Íslands.
Yfirlýsingin kemur í kjölfar yfirlýsingar frá konum í réttarvörslukerfinu sem birt var í gærkvöldi en henni fylgdu 45 reynslusögur af kynferðislegri áreitni, ofbeldi og kvenfyrirlitningu innan réttarvörslukerfisins.
„Þetta er kerfi sem mörg okkar stefna á að starfa í að námi loknu, en ljóst er að margt þarf að breytast svo vinnuumhverfið hljómi spennandi í hugum ungra femínískra lögfræðinga,“ segir í yfirlýsingunni. Taka félagsmenn undir orð þeirra sem stigu fram í gær um að vinna þurfi gegn kynbundnu ofbeldi og áreitni verði að vera sett í forgang og að allir vinnuveitendur þurfi að axla ábyrgð á að uppræta vandamálið.
Gagnrýnir félagið sérstaklega að þetta viðgangist innan kerfis sem eigi að vernda þolendur. „Kynbundið ofbeldi, áreitni og mismunun er staðreynd í þessari stétt eins og öðrum stéttum samfélagsins. Meðlimir femínistafélagsins Auðar vita þó að mörkin eru skýr og það á fólk sem vinnur í kerfinu einnig að vita. Það er því skammarlegt að í kerfi sem meðal annars á að sjá um að vernda þolendur ofbeldis þrífist ofbeldi, áreitni og mismunun. Við krefjumst þess að breytingar verði hér á.“
Að lokum beinir félagið orðum sínum að lagadeild skólans og kalla á breytingar þar. „Þá undra meðlimir félagsins sig einnig á því að þrátt fyrir að konum sem stunda nám við lagadeild Háskóla Íslands hafi farið fjölgandi og þær séu nú fleiri en karlar í deildinni upplifi þær deildina oft karllæga í viðhorfum. Þessu þarf jafnframt að breyta,“ segir í yfirlýsingunni. Segist félagið taka skýra afstöðu í þessum málaflokki. „Kynbundið ofbeldi, áreitni og mismunun á ekki að líðast. Breytum þessu svo það verði ekki fráhrindandi fyrir nýútskrifaða lögfræðinga sem langar að vinna af hugsjón í réttarvörslukerfinu að stíga þar inn.“