Lögreglan á höfuðborgarsvæðinu glímdi í vikunni við allsérstæða ráðgátu eftir að fullorðin kona tilkynnti um stuld á bíl sínum við verslunarmiðstöð.
Konan var sjálf með lykilinn að bílnum meðferðis og staðfesti jafnframt að aukalykillinn væri á öruggum stað á heimili hennar. „Þetta var því nokkur ráðgáta,“ segir í færslu lögreglunnar um málið á Facebook, „en málið var hið bagalegasta að öllu leyti eins og gefur að skilja“.
Ekki bætti heldur úr skák að jólagjafir voru í bílnum þegar „þjófurinn“ lét til skarar skríða. Við brottför frá lögreglustöðinni var þó ákveðið að konan myndi snúa aftur á bifreiðastæðið, leita enn betur að bílnum og staðfesta svo endanlega að hann væri horfinn. Ekki liðu margar mínútur uns aftur var hringt i lögregluna og tilkynnt að nú væri bíllinn kominn í leitirnar og jólagjafirnar sömuleiðis.„ Skýringin á „þjófnaðinum” reyndist einfaldlega vera sú að bílnum var aldrei stolið, heldur hafði konan einfaldlega gleymt því að lokinni innkaupaferðinni hvar hún lagði bílnum og síðan gert ráð fyrir hinu versta!“