Sjúkdómur sem breiðist út í villtum gæsum og öndum í Bretlandi gæti borist hingað vegna þess að íslenskar gæsir og endur hafa vetursetu á Bretlandseyjum.
Í umfjöllun um mál þetta í Morgunblaðinu í dag segir, að ekki hafi verið staðfest að sníkjudýrið sem veldur þessu sé í fuglum hér sem holdmærur en ýmsar tegundir þess finnast í öðrum dýrum hér á landi.
Sníkjudýrið Sarcocystosis sem Bretar nefna hrísgrjónabrjóst vegna þess hvernig einkenni þess koma fram í holdi sýktra fugla er algengt í öndum í Bandaríkjunum, að því er fram kemur í grein í The Telegraph, en var fyrst greint í Bretlandi árið 2010. Það er fyrst nú sem það veldur usla þar í landi. Tilkynnt hefur verið um einhverja tugi tilfella. Verið er að rannsaka málið betur enda er talið að sýkingin geti haft áhrif á stofna anda og gæsa í landinu.