Lögreglunni á höfuðborgarsvæðinu barst um klukkan 14 í dag tilkynning um að nokkur ungmenni væru komin út á íshellu sem lá yfir hluta Lækjarins í Hafnarfirði.
Þar sem ísinn var ekki talinn traustur fór lögreglan á vettvang og ræddi við ungmennin og gerði þeim grein fyrir hættunni sem getur stafað af þessu.
Sama var upp á teningnum er tilkynnt var um börn að leik á ís á Rauðavatni klukkan rúmlega þrjú í dag. Lögreglan fór á vettvang og voru þar bæði börn og fullorðnir að leik. Ísinn var hins vegar talinn traustur og því ekki ástæða til frekari aðgerða en áréttað var að fólk færi varlega.