Lög á deiluna koma ekki til greina

Sigurður Ingi Jóhannsson.
Sigurður Ingi Jóhannsson. mbl.is/Eggert

Sigurður Ingi Jóhannsson, samgöngu- og sveitarstjórnaráðherra, segir það ekki koma til greina að setja lög á boðað verkfall flugvirkja sem starfa hjá Icelandair. 

Ráðherrann hitti deiluaðila í gær til að fá upplýsingar um stöðuna og lýsti hann jafnframt yfir áhyggjum ríkisstjórnarinnar vegna deilunnar.

Hann segist hafa komið þeim sjónarmiðum á framfæri að engin áform væru uppi um að setja lög á deiluna. Hvatti hann menn til að finna ásættanlega leið til að semja, fyrir báða aðila.

Sigurður Ingi hitti einnig aðstoðarríkissáttasemjara í dag til að fá upplýsingar um stöðu málsins.

„Ég bað þá [deiluaðila] um að gera allt sem í þeirra valdi stæði til þess að ná saman og forða því að verkfall skylli á með tilheyrandi afleiðingum fyrir þriðja aðila, fyrir utan annað tjón,“ segir hann.

Spurður segir hann að verkfallið myndi hafa talsverðar afleiðingar. „Þetta er alltaf vont en sérlega viðkvæmt á svona tíma þegar fólk vill gjarnan komast heim og vera með fjölskyldum sínum. Ég bað aðila um að vera meðvitaða um ábyrgð sína, sem þeir voru.“

mbl.is

Bloggað um fréttina

Fleira áhugavert
Fleira áhugavert