Minningarathöfn verður haldin í minningu Klevis Sula á sunnudaginn klukkan 17.00 við tjörnina í Reykjavík. Klevis lést 8. desember eftir að hafa verið stunginn með hníf á Austurvelli aðfaranótt sunnudagsins 3. desember.
„Komum saman og sínum fjölskyldu hans alla okkar samúð, megi hann hvíla í friði,“ segir á Facebook-síðu vegna minningarstundarinnar.
Klevis ætlaði að hjálpa árásarmanninum á Austurvelli þegar hann var stunginn með þeim afleiðingum að hann lést fimm dögum síðar. Vinur Klevis var einnig stunginn en sár hans voru ekki lífshættuleg.
Fjársöfnun til styrktar fjölskyldu Klevis er lokið. Fjölskylda Klevis ætlar að flytja jarðneskar leifar hans heim til Albaníu og jarðsetja hann þar. Gæsluvarðhald yfir árásarmanninum rennur út á morgun.