Vatnajökulsþjóðgarður tilnefndur á heimsminjaskrá UNESCO

Vatnajökulsþjóðgarður og hluti gosbeltisins voru tilnefnd á heimsminjaskrá UNESCO í dag. Guðmundur Ingi Guðbrandsson, umhverfis- og auðlindaráðherra, og Lilja Alfreðsdóttir, mennta- og menningarmálaráðherra, undirrituðu tilnefninguna fyrir hönd íslenska ríkisins. Umsóknin var afhent heimsminjaskrá UNESCO í París í dag.

Í tilkynningu frá ráðuneytunum kemur fram að í tilnefningunni er áhersla lögð á rekbeltið, heita reitinn undir landinu og eldstöðvakerfi í gosbeltunum ásamt samspili elds og íss sem einstakt er talið á heimsvísu.

Á heimsminjaskrá UNESCO eru staðir sem teljast hafa gildi ekki einvörðungu fyrir viðkomandi land heldur fyrir allt mannkyn. Ísland á þegar tvo staði á heimsminjaskránni, Þingvelli (2004) og Surtsey (2008).

Vonast er til að ákvörðun af hálfu heimsminjanefndar UNESCO liggi fyrir um mitt ár 2019. „Mikil ásókn er frá ríkjum heims að fá staði á heimsminjaskrána og eru sett ströng skilyrði af hálfu heimsminjanefndar áður en samþykki er veitt,“ segir í tilkynningunni.

Undirritunin fór fram við Hoffellsjökul í dag, en auk ráðherranna tveggja voru fulltrúar sveitarfélaga, Vatnajökulsþjóðgarðs og höfunda texta, ásamt verkefnisstjórn, viðstödd.

Við umsókninni tóku dr. Mechtild Rössler, framkvæmdastjóri heimsminjaskrifstofu UNESCO, og Alessandro Balsamo sviðsstjóri en það voru Kristján Andri Stefánsson, sendiherra Íslands í Frakklandi, og Sigurður Á. Þráinsson, formaður verkefnisstjórnar um tilnefninguna, sem afhentu umsóknina. Ljósmynd/Aðsend

• 1 blogg um fréttina

Bloggað um fréttina

• Ómar Ragnarsson: Sagnaslóðin eða vindorkugarðurinn?