Guðrún Hafsteinsdóttir, formaður Samtaka iðnaðarins, segir það hafa gengið eftir sem hún varaði við að íslenskur iðnaður myndi ekki standa undir svo miklum launahækkunum.
Útflutningsfyrirtæki hafi tekið á sig stórhækkaðan launakostnað samtímis því sem gengið hafi styrkst. Fyrir vikið sé samkeppnisstaða margra þeirra orðin svo slæm að það hljóti að kalla á aðgerðir. Uppsagnir á 86 starfsmönnum Odda í vikunni séu váboði í þessu efni.
„Ég fór aldrei í grafgötur með að í þeirri kjarasamningalotu var boginn spenntur til hins ýtrasta. Auðvitað höfum við þungar áhyggjur af því að innlend framleiðsla sé á brún hengiflugs. Sá hryggilegi atburður sem varð í vikunni hjá Odda gæti verið upptaktur að hagræðingaraðgerðum fleiri fyrirtækja. Á tímabili hjálpaði styrking krónunnar mörgum fyrirtækjum, til dæmis í fyrra. Engu að síður voru hækkanirnar innanlands meiri en svo að sterkara gengi krónu gæti vegið á móti. Samkeppnisstaða margra fyrirtækja sem eru í útflutningi er til dæmis að engu orðin,“ segir Guðrún í fréttaskýringu um stöðu iðnaðarins í Morgunblaðinu í dag.