Rúmlega 1600 manns hafa skrifað undir áskorun til Sigurðar Inga Jóhannssonar samgönguráðherra þar sem hann er hvattur til að bæta vegasamgöngur á milli Borgarfjarðar eystri og Egilsstaða.
„Borgarfjarðarvegur nr. 94 er Íslandi öllu til skammar. Af 70 km leið milli Borgarfjarðar og Egilsstaða eru 28 km af handónýtum malarvegi,“ segir á síðunni þar sem fólk er hvatt til að skrifa undir.
Íbúar steyptu sjálfir fyrstu metra að nýjum vegi í Njarðvíkurskriðum fyrir viku síðan. Þeir eru orðnir langþreyttir á óviðunandi ástandi í vegamálum.
Borgfirðingar segja að góðar samgöngur skipti öllu máli. Borgarfjarðarvegur hafi lengi verið á samgönguáætlun en framkvæmdum sé alltaf frestað og aðrar færðar framar.
„Við erum fá. Við viljum ekki leggjast í eyði,“ segir á síðunni en íbúar á Borgarfirði eystri eru um 120.
Hægt er að skrifa undir áskorunina hér.